Դա խմբակային գործ ա, կուսակցությունը պիտի որոշի, խո իմ գլխու չեմ գնամ 1 միլիոն մուծեմ: Այս մասին, այսօր՝ փետրվարի 6-ին, Ազգային ժողովում լրագրողների հետ զրույցում նշել է ԱԺ ՀՀԿ խմբակցության պատգամավոր, գեներալ Սեյրան Սարոյանը՝ անդրադառնալով առաջիկա խորհրդարանական ընտրություններում իր առաջադրվելու հնարավորությանը:
«Իհարկե ցանկություն ունեմ, լիքը գործ ունենք անելու: Մրցում ա, ժողովուրդը ումը կընտրի, ամեն ինչ պարզ ա լինելու, էս անգամ չեն կարում խախտում անեն, իմ ընտրատարածքում չի եղել խախտում, էս անգամ էլ կտեսնեք»,-ասաց նա:
Ինչ վերաբերում է նախկին վարչապետ Հովիկ Աբրահամյանի Հանրապետական կուսակցությունից դուրս գալուն, Սարոյանն ասաց. «Ամեն մարդ իր ճանապարհը ինքն ա որոշում, ես ո՞վ եմ որ քննադատեմ՝ Հովիկ Աբրահամյանը գնաց թե մնաց, կամ ինքն ով ա որ քննադատա... կամ նեղանալը որն ա, մենք տղամարդ ենք»:
Սեյրան Սարոյանը չժխտեց, որ Հովիկ Աբրահամյանի հեռանալը թուլացրել է կուսակցությունը. «Եթե տունը 10 ախպեր ես, մեկը թողում գնում ա, իհարկե թուլանում ես»:
Գեներալ պատգամավորը նշեց, որ իր արած գործով է համոզելու, որ ընտրողները իրեն ձայն տան. «Գնացեք նայեք ժողովրդին հարցրեք»:
Լրագրողի դիտարկմանը իր նշած գործերը որպես Սեյրան Սարոյա՞ն է արել, թե որպես պատգամավոր, ՀՀԿ-ական պատգամավորը հեգնեց. «Բա իհարկե, հերս էլ վարչապետն էր»:
