Առաջիկա խորհրդարանական ընտրություններում Հայ ազգային կոնգրեսի համապետական ընտրական ցուցակը կգլխավորի հիմնադիր նախագահ Լեւոն Տեր-Պետրոսյանը: Այս մասին NEWS.am-ի հետ զրույցում ասել է ՀԱԿ խմբակցության քարտուղար Արամ Մանուկյանը:
«Մենք գնում ենք դաշինքով ՀԺԿ-ի հետ միասին՝ մեր փորձված գործընկերոջ հետ եւ մեր ցուցակը կգլխավորի Լեւոն Տեր-Պետրոսյանը: Տարածքային ցուցակներով առաջադրումները որոշ մասով հայտնի են, օրինակ ես առաջադրվելու եմ Արաբկիրում, որն, ըստ ինձ, ամենաըմբոստ ընտրատարածքն է եւ վստահ եմ Հայ ազգային կոնգրեսը շատ ձայն կհավաքի: Մեր խաղաղության ծրագիրը Վստահ եմ՝ ամբողջ հանրապետությունուն լուրջ համախոհների դաշտ կձեւավորի, վստահ եմ՝ այս ծրագիրը լինելու է առաջիկա ընտրությունների հիմնական քաղաքական թեման»,-ասաց պատգամավորը:
Արամ Մանուկյանը վստահեցրել է, որ ունեն մրցունակ թեկնածուներ. «Իրականություն է այն, որ հրապարակ են նետված կեղծ ընդդիմադիր ուժեր, սարքած քաղաքական ուժեր, որոնք խանգարելու են եւ խոստումներ են տալիս կամ փող, բայց մենք կառանձնանանք մեր ասելիքով: Մենք ներկայացնելու ենք դառը ճշմարտությունը՝ Հայաստանի առջեւ ծառացած իրական մարտահրավերը եւ ժողովուրդն էլ է զգում այդ խնդիրների լուծման անհրաճեժտությունը եւ այդ պատճառով կարծում ենք կունենանք ժողովրդի աջակցությունը»:
