Խորհրդարանական ընտրությունների օրվա փոփոխության հարցը կքննարկվի փետրվարի 17-ից հետո, երբ ավարտվեն քաղաքական ուժերի կողմից ԿԸՀ փաստաթղթեր ներկայացնելու գործընթացը եւ պարզ լինի, թե որ ուժերն են մտադիր մասնակցել ԱԺ ընտրություններին: Այս մասին NEWS.am-ի հետ զրույցում նշել է Կառավարության աշխատակազմի ղեկավար-նախարար Դավիթ Հարությունյանը:
Նշենք, որ չնայած ընտրության օրվա փոփոխության հավանականությանը` փետրվարի 6-ից մեկնարկել է քաղաքական ուժերի կողմից ԿԸՀ փաստաթղթեր ներկայացնելու գործընթացը, որը տեւելու է 10 օր: Փետրվարի 6-ի նշանակվել էր` ընտրությունները ապրիլի 2-ին անցկացնելու ժամկետից ելնելով:
Հարցին` արդյոք չպե՞տք է նախ հստակեցվեր ընտրությունների օրը եւ ըստ այդմ որոշվեին ընտրական ողջ գործընթացի ժամկետները, Դավիթ Հարությունյանը պատասխանեց. «Կարծում եմ` ոչ, նախագահի առաջարկությունը այլ է. պարզ լինի, թե որ քաղաքական ուժերն են հավակնում մասնակցել քաղաքական գործընթացին եւ միայն դրանից հետո նոր հնարավոր է` քննարկում կազմակերպել: Երբ կուսակցությունները առաջադրվեն, ավարտվի այդ ժամկետը, եւ եթե բոլոր կուսակցությունները համաձայնեն, ապա կորոնվեն մեխանիզմներ այն իրականացնելու համար»,-մանրամասնեց Դավիթ Հարությունյանը:
Ավելի վաղ տեղեկացրել էինք, որ հունվարի 26-ին տեղի ունեցած ՀՀԿ խորհրդի նիստի ժամանակ ՀՀԿ ղեկավար Սերժ Սարգսյանը հայտարարել էր, որ Հայաստանի հանրապետական կուսակցությունը քաղաքական խոչընդոտ չի տեսնում խորհրդարանական ընտրությունների օրը հետաձգելու համար, եթե բոլոր քաղաքական դերակատարները գան քաղաքական պայմանավորվածության: Նշենք, որ Հայ ազգային կոնգրեսն ու այլ քաղաքական ուժեր ՀՀԿ-ին կոչ էին արել տեղափոխել ընտրությունների օրը՝ պատճառաբանելով, որ նախ այդ օրը լրանում է ապրիլյան պատերազմի տարելիցը, բացի այդ իրավական առումով սխալ է ընտրությունները նշանակել ապրիլի 2-ին, քանի որ, ըստ այդ ուժերի, դա հակասում է Սահմանադրությանը:
