«Ժառանգություն» կուսակցությունը ուներ ծրագիր եւ պետք է այն կյանքի կոչեր, սակայն, այս պահի դրությամբ այդ ծրագրից հեռացողներ են եղել եւ այն կյանքի կոչողներ չկան: Այս մասին այսօր՝ փետրվարի 20-ին, «Ազատության» հետ զրույցում ասել է«Ժառանգություն» կուսակցության անդամ, նույնանուն խմբակցության պատգամավոր Զարուհի Փոստանջյանը՝ մեկնաբանելով «Ժառանգություն» կուսակցությունը լքելու իր որոշումը:
Նա նշել է, որ արդեն կուսակցությունը լքելու դիմում է ներկայացրել. «Ես ինքս ասել եմ, եթե որեւէ մեկի հետ հանդիպեք, քննարկեք ինչ-որ մեկի հետ դաշինք կազմելու հարցը, ես չեմ լինելու: Ինձ ասել են՝ դու առաջինների մեջ ես լինելու, ես ասել եմ՝ իմացեք ես չեմ լինելու: Այն անձինք, որոնք պետք է համագործակցեն այս տիրույթում նույնպես կուսակցության գաղափարախոսությունը կրողը չեն: Դա է հիմնական պատճառը, որ ես լքեցի կուսակցությունը: Քաղաքական դաշտում ովքեր գործում են, ես բոլորին լավ ճանաչում եմ»,-ասել է նա:
Զարուհի Փոստանջյանը նաեւ նշել է, որ խորհրդարանական ընտրություններում «Օհանյան-Րաֆֆի-Օսկանյան» դաշինքը չի հաղթելու. «Մեր հասարկությունն ամնեզիայով չի տառապում եւ շատ լավ ամեն ինչ հիշում է: Այս իշխանության մասնակից եղած անձինք հնարավոր է մի օր իրենց մեջ ոգեւորություն գտնեն եւ ասեն՝ այլեւս այսպես չի կարող, բայց որ նրանք դառնան հասարակության առաջնորդը, առաջ տանողը, ես դրան չեմ հավատում: «Ժառանգություն» կուսակցությունը, եթե միայնակ մասնակցեր ընտրություններին շանսերն ավելի մեծ կլինեին, հասարակության ընկալումը շատ ադեկվատ է, շատ լավ հասկանում է՝ ինչ է տեղի ունենում: Պետք չէր նման որոշում կայացնել»:
Զարուհի Փոստանջյանը նաեւ նշեց, որ կուսակցությունը լքելուց հետո, հնարավոր է, շարունակի քաղաքական գործունեությունը:
Ավելի վաղ տեղեկացրել էինք, որ «Ժառանգություն» կուսակցության անդամ, նույնանուն խմբակցության պատգամավոր Զարուհի Փոստանջյանը լքել է «Ժառանգություն» կուսակցությունը:
