ՀՅԴ-ն խորհրդարանական ընտրությունների օրը փոխելու առաջարկով հանդես չի գա, իսկ եթե մյուս ուժերը նախաձեռնեն, ապա կմիանան: Այս մասին NEWS.am-ի թղթակցի հետ զրույցում նշել է ԱԺ ՀՅԴ խմբակցության ղեկավար Աղվան Վարդանյանը:
Նշենք, որ կառավարության աշխատակազմի ղեկավար-նախարար Դավիթ Հարությունյանը երկու շաբաթ առաջ NEWS.am-ի հետ զրույցում հայտարարել էր, որ քաղաքական ուժերի առաջադրումներից հետո, եթե նման առաջարկ լինի եւ դրան միանան այլ ուժեր, ապա կառավարությունը կորոնի օրը փոխելու մեխանիզմները:
«Ինչու պիտի մենք նախաձեռնենք, թող իրենք նախաձեռնեն, ես այն ժամանակ եմ ասել, որ ճիշտ կլինի` դա նախաձեռնի Հանրապետական կուսակցությունը: Մենք նորմալ ենք վերաբերում, եթե բոլորը համաձայնեն, խնդիր չկա»,-ասաց Աղվան Վարդանյանը:
ԲՀԿ խմբակցության ղեկավար Նաիրա Զոհրաբյանն էլ նախօրեին մեզ հետ զրույցում ասել էր, որ ընտրության օրը փոխելու առաջարկով հանդես չեն գա, սակայն եթե այդպիսի նախաձեռնություն լինի` կմիանան: