«Ելք» դաշինքի համամասնական ցուցակի 2-րդ հորիզոնականը զբաղեցնող, «Հանրապետություն» կուսակցության նախագահ Արամ Սարգսյանն այսօր՝ մարտի 21-ին, Մեծ Մանթաշի ընտրողների հետ հանդիպմանն արձագանքել է այն տեսակետին, թե բոլոր քաղաքական ուժերը պետք է միավորվեն եւ պայքարեն ներկայիս իշխանությունների դեմ:
«2008թ. մարտի 1-ից հետո, երբ մեր ընկերներից 10 մարդ զոհվեց, էդ մարդիկ գնացին, մտան Նախագահական արթուրբաղդասարյաններով եւ ասացին՝ շեֆ ջան, մի երեք մինիստրի պաշտոն էլ մեզ տուր, քեզ շեֆ ասենք ու ֆռֆռանք: Հիմա ասում եք՝ միացեք նրանց, սրանց փոխեք, իրանց ու այս իշխանության տարբերությունը ո՞րն է, ես չեմ տեսնում այդ տարբերությունը»,- ասել է Արամ Սարգսյանը:
Դաշինքի անդամը համաձայն է, որ այս իշխանությունները վատն են, սակայն պետք է հասկանալ՝ ինչն ինչով պետք է փոխել. պետք չէ ընտրություն կատարել վատի ու վատթարի միջեւ. «Հեսա վարչապետը գալու է այստեղ ու ասի, որ առաջիկա տարիներին անելու են 270 մլն դոլարի ներդրում: Այ ախպեր ջան, ո՞վ է քեզ այդ թիվն ասել, ո՞վ է ներդրում անողը»:
Արամ Սարգսյանի գնահատմամբ, վարչապետ Կարեն Կարապետյանը նշանակվելուց հետո միայն թմբուկ է նվագել ու կոստյումը կախելուց ուրիշ ոչինչ չի արել: Նա անդրադարձել է նաեւ վարչապետի այն հայտարարությանը, թե գործարան կառուցելը պետության գործառույթը չէ:
«Ասում է՝ պետությունը պետք է մթնոլորտ ստեղծի, բայց մթնոլորտ ստեղծում է Սուրենյանը, իսկ վարչապետի գործն է երկիրը երկիր դարձնել, գյուղացու ստեղծածը մթերելն է, աշխատատեղ ստեղծելն է»,- նշել է Արամ Սարգսյանը:
