Մարզահամերգային համալիրի հարակից տարածքից այսօր մարդիկ երթով շարժվել են դեպի Շահումյանի գերեզմանատուն. «Սան Լազար» սգո սրահում տեղի է ունեցել «Հաց բերողի»՝ Արթուր Սարգսյանի հոգեհանգստի արարողությունը: Երթի մասնակիցները ծաղիկներով եւ «Հաց բերողի» լուսանկարով պաստառներով են եղել: Իսկ Ազատության հրապարակում նրա հիշատակին նաեւ մոմավառություն է կազմակերպվել:
Սարգսյանի հոգեհանգստին բազմաթիվ քաղաքացիներ, մշակույթի եւ քաղաքական գործիչներ են ներկա եղել: Եվս մեկ անգամ նշվել է, որ չէր կարելի Արթուր Սարգսյանին երկրորդ անգամ կալանավորել. առանց այն էլ խնդիրներ ունեցող Սարգսյանի առողջությունը քայքայեցին կալանավորումն ու հացադուլը: Արթուր Սարգսյանի հուղարկավորությունը տեղի կունենա մարտի 22-ին, ժամը 14-ին: Նրան հողին կհանձնեն Շահումյանի գերեզմանատանը:
Այսօր նույնպես Ազգային ժողովի նիստերի դահլիճը մարդաշատ չէր: Քառօրյա նիստերի գումարման համար կրկին քվորում չապահովվեց. խորհրդարան էր ներկայացել 15 պատգամավոր, մինչդեռ քվորում ապահովելու համար, հիշեցնենք, առնվազն 66 պատգամավորի ներկայություն է անհրաժեշտ: Առայժմ դժվար է կանխատեսել, թե նախընտրական քարոզչությամբ զբաղվող քաղաքական ուժերի ներկայացուցիչներն արդյո՞ք վաղը խորհրդարան կգան՝ կառավարության հետ հարցուպատասխանի:
Իսկ մինչ պատգամավորների հարցերին պատասխանելը, աշխատանքային այցով Արագածոտնում գտնվող վարչապետն այսօր ստիպված է եղել գյուղացիների հարցերի: Նա փորձել է բացատրել, որ գյուղացիների խնդիրներին պետք է համալիր լուծում տալ, ծրագրեր կազմել ու կառավարություն ներկայացնել, բայց գյուղացիները պարբերաբար ընդմիջել են վարչապետին ու առանձին պահանջներ ներկայացրել: Կարապետյանը չի դիմացել:
Մեկ այլ հարցադրում, բայց արդեն նախկին պաշտոնյայի, ուղղել են Շիրակում: Նախընտրական քարոզչության շրջանակում Արթիկ ժամանած Սեյրան Օհանյանին տրված հարցերը հիմնականում բանակին են վերաբերել: Մի կին դժգոհել է զինվորի եւ նրա ընտանիքի հանդեպ պետության անտարբերությունից: Զինվորների մայրերը դիմել են բնակարանների խնդրով, մի քանիսը նամակներ են հանձնել, նաեւ բողոքել բանակի սննդից եւ զինվորների հագուստից: Օհանյանն արձագանքել է. անսխալական կառույց չկա:
Րաֆֆի Հովհաննիսյանը մեր թղթակցի հետ զրույցում անդրադարձել է «Ժառանգություն»-ից Զարուհի Փոստանջյանի եւ Անահիտ Բախշյանի հեռանալուն: Ափսոսում է, որ կորցրել է թիմակիցներին, բայց համաձայն չէ նրանց կարծիքին, որ «Ժառանգություն»-ը հեռացել է իր սկզբունքներից:
Եվ նոր մանրամասներ Քուչակ գյուղում «Ծառուկյան» դաշինքի շտաբի պետի դանակահարության մասին: Քննչական կոմիտեի հաղորդագրության համաձայն՝ միջադեպի մասնակիցների միջեւ վիճաբանությունը ծագել է չնչին հարցերի շուրջ, մարմնական վնասվածք ստացածներն էլ Քուչակ եւ Արայի գյուղի բնակիչներ են: Քրեական գործ է հարուցվել, փորձում են պարզել դեպքի բոլոր հանգամանքներն ու միջադեպի մասնակիցների ինքնությունը:
Հիշեցնենք, որ Քուչակում վիճաբանության ժամանակ դանակահարվել են «Ծառուկյան» դաշինքի շտաբի պետ Արամ Ասատրյանը եւ դաշինքի համակիր Մանուկ Հովսեփյանը: Նրանք հիվանդանոց են տեղափոխվել:
Հայաստանից մեկնած եւ տարանցմամբ Բելառուսում վայրէջք կատարած օդանավում ռադիոակտիվ սարքավորում հայտնաբերելու մասին նոր մանրամասներ են հայտնի դարձել: Հիշեցնենք, որ մեղադրանքը հնչեցրել էր Ալեքսանդր Լուկաշենկոն, բայց Բելառուսի նախագահը, հավանաբար, «մոռացել» է հիշատակել, որ օդանավը բելառուսական ընկերության է պատկանել: Հայաստանի էներգետիկայի նախարարություն տեղեկացրել է, որ վերահսկիչ սարքավորումը դեռեւս 2016 թվականի հոկտեմբերին Հայաստան է առաքել խորվաթական «Ֆրիդ» ընկերությունը: Այն Երեւան է հասցրել բելառուսական «Aircompany Grodno» ընկերությունը՝ պարտավորվելով նույն կերպ սարքավորումը հետ առաքել: 2017-ի մարտի 15-ին բելառուսական ընկերությունը Երեւան-Գոմել չվերթի իրականացման հայցադիմում է ներկայացնել, չվերթի իրավունք ստացել: Նախարարությունում ընդգծել են, որ սարքավորման տեղափոխման գործընթացն իրականացվել է տրանսպորտային ընկերության հետ պայմանագրի, միջազգային կարգավորող կանոններին համապատասխան:
Կոտայքի մարզում մահվան ելքով վթար է տեղի ունեցել: «ՎԱԶ 2107» մակնիշի ավտոմեքենայի վարորդը Երեւան-Սեւան ավտոճանապարհի «Արծվի թեւերի» հատվածում դեպի Երեւան ընթանալիս բախվել է գովազդային սյանը, այնուհետեւ դուրս եկել հանդիպակաց երթեւեկելի գոտի։ Վթարի հետեւանքով վարորդն ու ուղեւորը մարմնական վնասվածքներով տեղափոխվել են հիվանդանոց: Վիրավորներից մեկը, սակայն, գիտակցության չգալով՝ մահացել է։
«Եվրատեսիլ 2017» երգի մրցույթում, ինչպես գիտենք, Հայաստանը ներկայացնելու է Արծվիկ Հարությունյանը: Բայց հնարավոր է, որ երգչուհուն թույլ չտան մասնակցել Կիեւում անցկացվող մրցույթին՝ Ղրիմ այցելության պատճառով: Ուկրաինայի անվտանգության ծառայություններն ուզում են ստուգել՝ երգչուհին եղե՞լ է Ղրիմում, թե՞ ոչ: Երկրի ներքին գործերի նախարարությունից հայտնել են, որ եթե պարզվի, որ Հարությունյանն իսկապես այցելել է Ղրիմ, ապա նրա մասով առանձին որոշում կկայացվի: Հավելենք, որ «Եվրատեսիլ»-ն անցկացվելու է մայիսի 9-ին, 11-ին եւ 13-ին Կիեւում:
Մարտի 21-ին դոլարի անկումը կանգ է առել, իսկ եվրոն եւ ռուբլին թանկացել են: Արդյունքում դոլարի փոխարժեքն այսօր կազմել է 483 դրամ, եվրոյինը՝ 521, ռուբլունը՝ 8 դրամ 46 լումա, ֆունտինը՝ 602 դրամ:
Մարտի 22-ի հանրապետության շրջանների մեծ մասում ժամանակ առ ժամանակ տեղումներ են սպասվում, լեռնային եւ նախալեռնային գոտիներում՝ ձյան տեսքով: Օդի ջերմաստիճանն էապես չի փոխվի: Երեւանում նույնպես վաղը ժամանակ առ ժամանակ տեղումներ կլինեն: Մայրաքաղաքում գիշերը կդիտվի 0+2, ցերեկը՝ +8+10 աստիճան տաքություն: