Ձերբակալվել է Արցախի պաշտպանության նախկին նախարար Սամվել Բաբայանը: Ազգային անվտանգության ծառայությունը պաշտոնապես հաստատել է տեղեկությունը:
ԱԱԾ-ն նաեւ հայտնել է, որ Բաբայանը ձերբակալվել է մաքսանենգ եղանակով Վրաստանից Հայաստան «ԻԳԼԱ» տեսակի զենիթա-հրթիռային համալիրի տեղափոխման գործով: Քրեական գործի շրջանակում, Բաբայանից բացի, եւս 2 անձ է ձերբակալվել: Այսօր ԱԱԾ-ն տեղեկություն էր տարածել, որ հայտնաբերվել ու առգրավվել է «ԻԳԼԱ»-ի արձակման խողովակ՝ «9M39» հրթիռով: Ծառայությունում արժանահավատ տվյալներ ունեն, որ համալիրի բաղկացուցիչ մասերի ձեռքբերումն ու փոխադրումն իրականացրած անձինք գործել են Սամվել Բաբայանի հետ նախնական համաձայնությամբ եւ նրա պատվերով: Փորձագիտական եզրակացության համաձայն՝ մարտական հրթիռը պիտանի է հետագա շահագործման համար: Ներկայում փորձում են պարզել զենիթա-հրթիռային համալիրի բաղկացուցիչ մասերի ձեռքբերման շարժառիթները, հնարավոր օգտագործման նպատակները, ինչպես նաեւ ֆինանսավորման աղբյուրները:
Համարվում է, որ Սամվել Բաբայանը համակարգում է «Օհանյան-Րաֆֆի-Օսկանյան» դաշինքի գործունեությունը: Այստեղ Բաբայանի ձերբակալությունը կապում են հենց ՕՐՕ դաշինքի նախընտրական գործունեության հետ:
«Հաց բերողին»՝ Արթուր Սարգսյանին այսօր հողին հանձնեցին Շահումյանի գերեզմանատանը: Նրան վերջին հրաժեշտը տալու էին եկել բազմաթիվ քաղաքացիներ, հայտնի մշակույթի եւ քաղաքական գործիչներ: «Հաց բերողին» քաղաքացիները սգո սրահից մինչեւ գերեզմանատուն ծափահարություններով եւ «Արթուրը չի մահացել, Արթուրը զոհվել է», «Փառք Հաց բերողին» վանկարկումներով են ուղեկցել, որոնց են միացել նաեւ անցորդները:
Հիշեցնենք, որ Արթուր Սարգսյանը վախճանվեց մարտի 16-ին: Նրան մեղադրում էին «Սասնա ծռերին» օժանդակելու մեջ: Անցյալ տարվա ամռանը ոստիկանության Երեւանի ՊՊԾ գնդի տարածքը գրավելու օրերին նա կրակահերթերի տակ ավտոմեքենայով ճեղքել էր ոստիկանական պատն ու սնունդ տարել «Սասնա ծռերին»: Կալանքի հետ անհամատեղելի հիվանդության պատճառով Արթուր Սարգսյանին դեկտեմբերի 31-ին ազատ արձակեցին, ապա կրկին կալանավորեցին՝ քննչական մարմին չներկայանալու պատճառաբանությամբ: Խափանման միջոց կալանքը փոխելու պահանջով Սարգսյանը 25 օր հացադուլի մեջ էր: Խափանման միջոցը փոխվեց մարտի 6-ին: Արթուր Սարգսյանը 48 տարեկան էր, մասնագիտությամբ քանդակագործ, փորագրող վարպետ:
Լեւոն Տեր-Պետրոսյանը հյուրընկալվել է Հանրային հեռուստատեսության «Օրակարգից դուրս» հաղորդմանն ու խոսել ղարաբաղյան հակամարտության կարգավորման մասին: Հայաստանի առաջին նախագահն ասել է, որ հակամարտության կարգավորման սկզբունքները որոշել ենք ոչ թե մենք, Ղարաբաղը կամ Ադրբեջանը, այլ միջազգային կառույցները: Ներկայացնելով այդ սկզբունքները՝ Տեր-Պետրոսյանը վերահաստատել է իր դիրքորոշումը. խաղաղություն կարելի է ձեռք բերել տարածքների վերադարձի, ուժի կամ ուժի սպառնալիքի չկիրառման եւ Ղարաբաղի ինքնորոշման իրավունքի սահմանման միջոցով:
Հինգերորդ գումարման Ազգային ժողովի վերջին քառօրյան, կարծես, վերջնականապես տապալվում է: Այսօր նույնպես չեն կարողացել քվորում ապահովել. խորհրդարան էր ներկայացել ընդամենը 13 պատգամավոր: Հերմինե Նաղդալյանը, սակայն, հույսը չէր կորցնում. հայտարարել է, որ գրանցումը շարունակվելու է 3 ժամ՝ հույս հայտնելով, որ «բազմազբաղ պատգամավորները կվերադառնան դահլիճ», բայց սահմանված ժամկետի ավարտին այդպես էլ չի հաջողվել քվորում ապահովել:
Մեծ Բրիտանիայի խորհրդարանի մոտ արտակարգ միջադեպ է տեղի ունեցել: Նախ տեղեկություն տարածվեց, որ խորհրդարանի մոտ՝ Վեսթմինստերյան կամրջի վրա, հրաձգություն է տեղի ունեցել: Հետո բրիտանական լրատվամիջոցները հայտնեցին զինված տղամարդու մասին, որը հարձակվել է ոստիկանի վրա եւ վիրավորել նրան: Հարձակվողին գնդակահարել են:
Բացի այդ, ավտոմեքենա է մխրճվել մարդկանց բազմության մեջ: Միջադեպի հետեւանքով մեկ կին է զոհվել, մեկ տասնյակից ավելի տուժածներ կան: Խորհրդարանականներին տարհանել են, Վեսթմինստերյան կամուրջը՝ փակել: Սքոթլանդ Յարդը դեպքն ահաբեկչություն է որակել:
«Սասնա ծռեր» խմբի անդամ Հովհաննես Հարությունյանին «Նուբարաշեն» քրեակատարողական հիմնարկից քաղաքացիական հիվանդանոց են տեղափոխել: Նրա շահերի պաշտպանն ասում է՝ արտերկրից ժամանած բժիշկները Հովհաննեսի մոտ ոսկրի վարակ են կասկածում: Վնասվածքաբանության կենտրոնից էլ տեղեկացրել են, որ Հարությունյանն իրենց մոտ է տեղափոխվել սերտաճած կոտրվածքով, հետազոտությունից հետո պարզ կլինի, թե ինչ խնդիրներ ունի: Հովհաննես Հարությունյանը, հիշեցնենք, ոտքի ծանր վիրավորում է ստացել ոստիկանության ՊՊԾ գնդի տարածքում:
«Եվրատեսիլ» երգի մրցույթում այս տարի Հայաստանը ներկայացնող Արծվիկ Հարությունյանը յուրահատուկ ֆլեշմոբ է նախաձեռնել: Facebook-իր իր էջում երգչուհին մարտահրավեր է նետում «Եվրատեսիլի» այս տարվա մասնակիցներին՝ առաջարկելով հայկական ազգային երգ կատարել: Ինքն առաջին քայլն է արել՝ գերմաներեն երգ կատարելով, ու մարտահրավերն ուղղել Գերմանիան ներկայացնող Լեւինային: Լեւինան ընդունել է Արծվիկի մարտահրավերը: Երգչուհին Facebook-ում հրապարակել է «Կաքավիկ» հայտնի երգի իր կատարումը եւ հայերեն ողջունել իր երկրպագուներին:
Եվ եվրատեսիլյան կրքերի մասին: Երեկ հայտնի դարձավ, որ Արծվիկին, հնարավոր է, թույլ չտան մասնակցել Կիեւում կայանալիք մրցույթին: Պատճառը Ղրիմ այցելությունն է: Իսկ այսօր տեղեկություն տարածվեց, որ Կիեւում ելույթ ունենալու հնարավորություն հաստատապես չի ունենա Ռուսաստանը ներկայացնող Յուլյա Սամոյլովան: Նրա «մեղքը» նույնպես Ղրիմ ուղեւորությունն է: Ի դեպ՝ Սամոյլովան Ուկրաինա չի կարողանա մուտք գործել երեք տարի:
Մարտի 22-ին դոլարը նորից սկսել է թանկանալ, իսկ եվրոն եւ ռուբլին էժանացել են: Արդյունքում դոլարի փոխարժեքն այսօր կազմել է 483 դրամ, եվրոյինը՝ 521, ռուբլունը՝ 8 դրամ 36 լումա, ֆունտինը՝ 602 դրամ:
Մարտի 23-ի հանրապետության շրջանների մեծ մասում սպասվում է առանց տեղումների եղանակ: Սյունիքում եւ Արցախում ժամանակ առ ժամանակ տեղումներ կլինեն: Օդի ջերմաստիճանն աստիճանաբար 5-6 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի 0+2, ցերեկը՝ +11+13 աստիճան տաքություն:
