Ես մեծ հույս ունեմ, որ խորհրդարանական ընտրություններում Հայաստանի հանրապետական կուսկացության հաղթանակի դեպքում ինձ կվստահվի Պաշտպանության նախարարությունում աշխատանքի շարունակությունը։ Այս մասին ռուս լրագրողների հետ հանդիպման ժամանակ հայտարարել է ՀՀ պաշտպանության նախարար Վիգեն Սարգսյանը, ով գլխավորում է ՀՀԿ նախընտրական ցուցակը։
Նա նշել է, որ Հայաստանի պետական կառավարման համակարգում պաշտպանության նախարարի պաշտոնը վճռական ու շատ կարեւոր դիրք է համարում՝ հաշվի առնելով առկա մարտահրավերներն ու սպառնալիքները։
«Աշխատանքի համար մեծ դաշտ եմ տեսնում եւ մեծ հույս ունեմ, որ պաշտպանության ոլորտում բարեփոխումներն իրականացնելու ժամանակ կլինի, որոնք ժամանակի մարտահրավերներ են եւ շատ են ազդում երկրի պաշտպանունակության վրա։ Մենք շատ հարցեր ունենք, որոնք պետք է համալիր լուծել», - ասել է Սարգսյանը։
Նրա խոսքով՝ հաշվի առնելով Հայաստանում պարտադիր զինվորական ծառայությունը՝ պետք է այնպես անել, որ այդ երկու տարին ոչ թե հայրենիքին տրված պարտք լինեն, այլ որպեսզի երիտասարդները կարողանան հավելյալ կրթություն ստանալ, հմտություններ զարգացնել։
Սարգսյանը նաեւ նշել է, որ շատ բան պետք է անել Հայաստանի զինուժի մարտունակությունը բարձրացնելու համար։ «Այդ իմաստով ես երջանիկ կլինեի, եթե ՀՀԿ-ի հաղթանակն ինձ թույլ տար շարունակել աշխատանքը, որը ես եւ գործընկերներս սկսել են այս վեց ամսում եւ վստահ եմ, որ կկարողանանք ավարտին հասցնել»,-ասել է նա։