Սեւանա լճում այսօր՝ ապրլի 14-ին, մահացած հայտնաբերված Արծվանիստի 46-ամյա բնակիչը մտածված է նետվել նավակից: Այս մասին NEWS.am-ի հետ զրույցում ասաց Արծվանիստի գյուղապետ Սամվել Օհանյանը: Նա նշեց, որ տղամարդը նախկինում եւս մի քանի անգամ փորձել է նման քայլի գնալ, սակայն, հարազատները կանխել են: Իսկ այս անգամ նրա կինն ու եղբոր որդիները չեն հասցրել նրան հետ պահել այդ քայլից:
«Հիվանդություններ ուներ, մի քանի անգամ նախկինում էլի նման քայլի գնացել է, բայց կանխել են: Այս անգամ մինչեւ կինը հետեւից վազել է՝ արդեն ափից հեռացել է: Տեսել են՝ ինչպես է իրեն ջուրը նետում: Նավակն էլ իր հին նավակն է եղել, որը երկար ժամանակ չի օգտագործել, որովհետեւ հաշմանդամություն ուներ»,-ասաց գյուղապետը:
46-ամյա Հ. Ե.-ն ունի երկու որդի՝ նրանցից մեկը բանակում է, մյուսը՝ Ռուսաստանում:
Ավելի վաղ Հայաստանի ԱԻՆ-ից NEWS.am-ին հայտնել էին, որ ապրիլի 13-ին, ժամը 22:05-ին ահազանգ էր ստացվել, որ Գեղարքունիքի մարզի Արծվանիստ գյուղի մոտակայքում քաղաքացին նավակով մտել է Սեւանա լիճ (մոտ 50 մ) եւ չի վերադարձել, անհրաժեշտ է փրկարարների օգնությունը։
Այսօր՝ ապրիլի 14-ին, ժամը 07:53-ին որոնողական աշխատանքները վերսկսվել էին, իսկ արդեն ժամը 09:15-ին ափից 200 մ հեռավորության վրա փրկարարները հայտնաբերել են Հ. Ե.-ի դին: