Ֆրանսիայի նախագահական ընտրությունների առաջին փուլի քվեարկության արդյունքները սկզբում խոսում էին «Ազգային ճակատի» առաջնորդ Մարի Լը Պենի հաղթանակի մասին, բայց հետո պատկերը սկսեց փոխվել՝ հօգուտ «Առաջ» շարժման առաջնորդ Էմանուել Մակրոնի: Առավոտյան 97% քվեների հաշվարկի արդյունքում ձայների տարբերությունը կազմում էր 2%. Մակրոնը ստացել է 23.86%, Լը Պենը՝ 21.43%, հաղորդում է ՌԻԱ Նովոստին:
Եվս երկու թեկնածուներ՝ նախկին վարչապետ Ֆրանսուա Ֆիյոնն ու Ժան Լյուկ Մելանշոնը ստացել են, համապատասխանաբար, 19.94% եւ 19.62%: Սակայն ընտրապայքարը կշարունակեն միայն առաջին երկու տեղերը զբաղեցրած թեկնածուները:
Նախագահական ընտրությունների երկրորդ փուլը տեղի կունենա մայիսի 7-ին եւ, ամենայն հավանականությամբ, կհաղթի Մակրոնը, եթե հավատանք վերջին հարցման արդյունքներին: Երեկ Ipsos կազմակերպության հրապարակած հարցումների համաձայն՝ Մակրոնը Լը Պենին կհաղթի 62%-38% հարաբերակցությամբ, ըստ Harris Interactive-ի էլ՝ 64%-36% հարաբերակցությամբ:
Մակրոնին երկրորդ փուլ անցնելու կապակցությամբ արդեն շնորհավորել են գործող նախագահ Ֆրանսուա Օլանդն ու եվրոպական այլ գործիչներ:
Սակայն հանրային կարծիքի ուսումնասիրման Ifop կենտրոնի ներկայացուցիչ Ֆրեդերիկ Դաբը CNews-ի եթերում հայտարարել է, որ թե՛ Ֆիյոնի, թե՛ Մելանշոնի կողմնակիցները կարող են իրենց անկանխատեսելի դրսեւորել, քանի որ նրանք բացասաբար են վերաբերվում առաջին երկու հորիզոնականները զբաղեցրած թեկնածուներին: Վերլուծաբանը նաեւ հիշեցրել է, որ նախընտրական արշավի սկզբին ոչ ոք չէր հավատում Լը Պենի նման հաջողությանը: