Հայոց ցեղասպանության 102-րդ տարելիցի կապակցությամբ այսօր՝ ապրիլի 24-ին, Ծիծեռնակաբերդի հուշահամալիրում Ամենայն Հայոց Կաթողիկոս Գարեգին Երկրորդը հոգեհանգստյան կարգ է մատուցել։
Նշենք, որ Հայաստանի նախագահ Սերժ Սարգսյանն ու առաջին տիկին Ռիտա Սարգսյանը ապրիլի 24-ի առավոտյան այցելել են «Ծիծեռնակաբերդ» հուշահամալիր եւ հարգանքի տուրք մատուցել 1915թ. Մեծ եղեռնի զոհերի հիշատակին։ Նախագահը ծաղկեպսակ է դրել հուշահամալիրին:
Պետության ղեկավարին ուղեկցել են Ամենայն հայոց կաթողիկոս Գարեգին Բ-ն, ԱԺ նախագահ Գալուստ Սահակյանը, ՀԱՊԿ գլխավոր քարտուղար Յուրի Խաչատուրովը, ՀՀ վարչապետ Կարեն Կարապետյանը, ՍԴ նախագահ Գագիկ Հարությունյանը, կառավարության անդամներ:
Վաղ առավոտից Ծիծեռնակաբերդի բլուր են ուղեւորվում հազարավոր մարդիկ, դիվանագիտական կորպուսի, սփյուռքի ներկայացուցիչներ, հյուրեր եւ հայաստանցիներ։
Ավելի վաղ ՀՀ նախագահ Սերժ Սարգսյանը հանդես էր եկել ուղերձով, որտեղ նշել է, որ Արցախի հերոսամարտը ապացուցեց, որ նոր ցեղասպանություն մենք թույլ չենք տալու: