Գյումրիում ռուսական ռազմաբազայի զինծառայողի սպանության գործով ձերբակալված Արման Ջանջուղազյանը տարվել է դեպքի վայր, նա նկարագրել է, թե ինչպես է տեղի ունեցել դեպքը: Այս մասին այսօր՝ ապրիլի 24-ին, NEWS.am-ի հետ զրույցում ասաց նրա շահերի պաշտպան Արամայիս Հայրապետյանը:
«Այս պահին իմ պաշտպանյալը կասկածյալի կարգավիճակում է, նրան Երեւան են տեղափոխել, որովհետեւ դեպքը քննվելու է Երեւանի քննչական կոմիտեի գլխավոր վարչությունում: Վաղը լրանում է 72 ժամը, նրան մեղադրանք կառաջադրվի կամ հակառակը»,-ասաց նա:
Արամայիս Հայրապետյանը նշեց, որ իր պաշտպանյալի մոտ հոգեկան խնդիրներ են հայտնաբերվել դեռեւս 2016թ., երբ նա բանակում ծառայելիս է եղել: Առողջական խնդիրների պատճառով էլ նա Կապանում 3 ամիս ծառայելուց հետո զորացրվել է:
«Ես քրեական գործում ներգրավվել եմ հենց այդ հիմքով, նախաքննական մարմինը տվյալներ ունի, որ նա հոգեկան առողջության խնդիրներ ունի»,-ասաց նա:
Պաշտպանը նաեւ նշեց, որ ռուս զինծառայողի սպանության մեջ կասկածվողը Ստեփանավան քաղաքի բնակիչ է, նա Գյումրի է գնացել հենց սպանության օրը:
«Քանի որ նախաքննական գաղտնիք է, այս պահին չեմ կարող ասել, թե ինչ ցուցմունք է տվել պաշտպանյալս, նրա հետո խոսել եմ եւ մեղադրանքն առաջադրելուց հետո նոր կկարողանանք հայտնել մեր դիրքորոշումը»,-ասաց նա:
Նա նաեւ նշեց, որ Արման Ջանջուղազյանի ձեռքերին վնասվածքներ են հայտնաբերվել, որոնք նա ստացել է ռուս զինծառայողի սպանության օրը: Թե ինչ հանգամանքներում է այդ վնասվածքները ստացել՝ կպարզվի դատաբժշկական փորձաքննության արդյունքում:
Ավելի վաղ տեղեկացրել էինք, որ Գյումրիում ռուսական 102-րդ ռազմաբազայի պայմանագրային զինծառայողի սպանության կասկածանքով ձերբակալվածը հոգեկան առողջության հետ կապված որոշ խնդիրներ ունի:
Սպանության փաստով հարուցվել է քրեական գործ՝ 104-րդ հոդվածի 1-ին մասի հատկանիշներով։ Կատարվում է նախաքննություն՝ դեպքի մանրամասները պարզելու համար։ Սպանվածի անձը հաստատվել է. նա պայմանագրային զինծառայող Դմիտրի Յալպաեւն է, 21 տարեկան: Սպանությունը կատարելու կասկածանքով ձերբակալվել է 20-ամյա Ջ.Ա.-ն: