Երեւանի Շենգավիթ վարչական շրջանում այսօր՝ ապրիլի 25-ին, Երեւանի քաղաքապետ, քաղաքապետի թեկնածու Տարոն Մարգարյանը բնակիչների հետ հանդիպմանն իր թիմը որակեց բանիմաց, պրոֆեսիոնալ եւ աշխատող եւ կոչ արեց հավաքված քաղաքացիներին քվեարկել հենց իր թիմի օգտին:
«Մենք մեր թիմով եկել ենք ձեր վստահության քվեն խնդրելու, խնդրելու, որպեսզի թույլ տաք իրականացնել մեր հնգամյա ծրագիրը: Մեր նախընտրական ծրագիրն իրատեսական է, միայն խոստումներ չեն, մեր կատարած աշխատանքի շարունակությունն է մեր ներկայացրած ծրագիրը»,-ասաց նա:
Միեւնույն ժամանակ, քաղաքապետը վստահություն հայտնեց՝ նշելով, որ երեւանցին գիտի, թե ընտրությունների օրն ում է տալու իր քվեն: Նա կոչ արեց մայիսի 14-ին՝ Երեւանի ավագանու ընտրությունների օրը, քվեարկել այն թիմի օգտին, որը 5 տարիների փորձ ունի եւ հենց այդ փորձի հիման վրա էլ կազմել է իր նախընտրական ծրագիրը:
«Երեւանցին գիտի՝ իր քվեն ում է տալու, պրոֆեսիոնալ թիմին, աշխատող թիմին, բանիմաց թիմին, այն թիմին, որը եղել է ժողովրդի կողքին, այն թիմին, որը տարիներ շարունակ ժողովրդի հետ շփվելով, ժողովրդի կարծիքը լսելով նախընտրական ծրագիր է կազմել»,-ասաց նա:
Հիշեցնենք, որ Երեւանի ավագանու ընտրությունները տեղի կունենա մայիսի 14-ին, ընտրություններին մասնակցում է Հայաստանի հանրապետական կուսակցությունը, «Երկիր Ծիրանին» եւ «Ելք» դաշինքը: