Ովքե՞ր են ապրիլի 2-ի ընտրությունների արդյունքում խորհրդարան անցել, բայց հրաժարվել պատգամավորական մանդատից: Կենտրոնական ընտրական հանձնաժողովն այսօր հրապարակել է ինքնաբացարկի դիմում ներկայացրածների ցանկը. նրանք Հանրապետական, Դաշնակցություն կուսակցություններից եւ «Ծառուկյան» դաշինքից են:
ՀՀԿ-ում մանդատից հրաժարվել է 9 մարդ, հիմնականում նրանք, ովքեր ներկայում գործադիրում որեւէ պաշտոն են զբաղեցնում: Նրանց թվում են պաշտպանության եւ մշակույթի նախարարներ Վիգեն Սարգսյանն ու Արմեն Ամիրյանը, Երեւանի քաղաքապետի թեկնածու Տարոն Մարգարյանը, Գալուստ Սահակյանի որդին՝ Արման Սահակյանը: Մանդատից հրաժարվել է նաեւ Արտակ Զաքարյանը, որը, ինչպես հայտնի է, պաշտպանության նախարարի տեղակալ է նշանակվելու: Հետաքրքիր է, որ կառավարության կազմից արդարադատության նախարար Արփինե Հովհաննիսյանը չի հրաժարվել մանդատից, Ազգային ժողովում տեղի կունենա նաեւ Արա Բաբլոյանը, որը, ավելի վաղ հրապարակված տեղեկությունների համաձայն, որոշել էր դիվանագիտական կարիերա սկսել:
«Ծառուկյան» դաշինքում թեկնածուների ընտրությունը հաստատեց օրեր շարունակ շրջանառվող լուրերը, որ Գագիկ Ծառուկյանը միանձնյա է որոշում՝ ո՞վ պետք է գնա խորհրդարան եւ անցողիկ տեղերում հայտնվածներին ստիպում է ինքնաբացարկ հայտնել: Մանդատից հրաժարվածների թիվն այստեղ տպավորիչ է՝ 23 մարդ: Նրանց թվում են Արարատ Զուրաբյանը, Արթուր Մամոյանը, ԲՀԿ-ի հնաբնակ Լյովա Խաչատրյանն ու նախկին ՀՀԿ-ական պատգամավոր Խաչիկ Մանուկյանը:
ՀՅԴ-ից մանդատից հրաժարվել է ընդամենը երեքը՝ Դավիթ Լոքյանը, Լեւոն Մկրտչյանը եւ Արծվիկ Մինասյանը: Հիշեցնենք, որ Հանրապետականի հետ կոալիցիա կազմելուց հետո այս գործիչները նախարարի պորտֆել ստացան: Ամենայն հավանականությամբ՝ Դաշնակցությունը նախատեսում է, որ կոալիցիոն նոր հուշագրի ստորագրումից հետո այս եռյակը նորից կառավարության կազմում կհայտնվի:
«Դեմ եմ հանրապետականին» նախաձեռնությունը Զարուհի Փոստանջյանին ու Նիկոլ Փաշինյանին կոչ է անում միավորվել: Այդ դեպքում, ըստ նախաձեռնության հայտարարության, մեծ է հավանականությունը, որ ՀՀԿ-ն չի հաղթի Երեւանի ավագանու ընտրություններում:
«Երկիր Ծիրանի» կուսակցության ղեկավարը, սակայն, չի պատրաստվում միանալ «Ելք»-ին: Պարզաբանում է. ծրագրային լուրջ տարբերություններ ունեն, բայց ավագանիում մեծամասնություն կազմելու դեպքում պատրաստ են համագործակցել նրանց հետ:
Զարուհի Փոստանջյանը նաեւ կարծում է, որ Տարոն Մարգարյանի գնացքը վաղուց գնացել է: Մրցակցին նաեւ խորհուրդ ունի. առաջարկում է կարդալ Ջորջ Օրուելի «1984»-ը: Փոստանջյանն այսօր թիմակիցների հետ Սարի թաղում էր: Անցյալ տարվա հուլիսի դեպքերն է հիշել, շնորհակալություն հայտնել սարիթաղցիներին՝ իրենց պաշտպանելու համար: Այստեղ քաղաքապետի թեկնածուին շատերն են աջակցություն հայտնել:
Իսկ Նիկոլ Փաշինյանը քարոզարշավի ընթացքում արդեն երկրորդ անգամ ստիպված է լինում ոստիկանություն ահազանգել եւ հաղորդում տալ իրավախախտի մասին: Այս անգամ միջադեպ է տեղի ունեցել Էրեբունիում քարոզչության ժամանակ: «Ելք»-ի անդամները բակերից մեկում չթույլատրված վայրում արագ երթեւեկող մեքենա են նկատել: Փաշինյանը տեղում ոստիկանություն է զանգել:
Գործող քաղաքապետն էլ այսօր Դավիթաշենում էր: Լրագրողները Տարոն Մարգարյանին հարցրել են վերջին օրերին մրցակիցների կողմից իր հասցեին հնչող տարբեր քննադատությունների մասին: Նիկոլ Փաշինյանը նրան մեղադրել էր կողմնակալության մեջ՝ նշելով, որ Մարգարյանի հարազատ Ավան վարչական շրջանում, մասնավորապես, վերելակային տնտեսության սպասարկման համար մեկ վերելակի հաշվարկով քաղաքապետարանը 620.000 դրամ է ծախսել, իսկ Շենգավիթում այդ նույն ժամանակահատվածում՝ ընդամենը 1400 դրամ։ Տարոն Մարգարյանը հակադարձել է. այդ հաշվարկը տնտեսագիտական փորձի պակասի արդյունք է: Տարոն Մարգարյանն անդրադարձել է նաեւ Փաշինյանի այն հայտարարությանը, թե ժամանակին իր ծննդյան տարեդարձին հորից նվեր է ստացել Ավանի թաղապետի պաշտոնը:
Այսօր հողին են հանձնել Արցախի հերոս Քյարամ Սլոյանի հորը՝ Քյալաշ Սլոյանին: Սլոյանների հարազատներն ու համագյուղացիներն ասում են՝ հայրը Քյարամի կորստի վշտից մահացավ: Որդու զոհվելուց հետո երկու անգամ սրտի կաթված է տարել, պարբերաբար բուժում ստացել հիվանդանոցում, բայց՝ անօգուտ:
Քյալաշ Սլոյանի առողջական վիճակը վերջնականապես վատացել է Քյարամի ծննդյան օրը՝ ապրիլի 27-ին: Հիվանդանոց տեղափոխվելուց երկու օր անց էլ մահացել է: Քյարամի եղբայրը՝ Համիկ Սլոյանն ասում է, որ հայրը չափազանց ծանր վիճակում է հայտնվել, երբ Քյարամի գլխատված դին է տեսել: Քյարամ Սլոյանը զոհվել է 2016 թվականի ապրիլյան պատերազմի առաջին իսկ օրերին: Ադրբեջանցի զինվորները նրան սպանել են ու գլխատել, իսկ հետո երիտասարդի գլուխը բռնած լուսանկարվել ու նկարները տարածել համացանցում:
Հայկական շուկայում ադրբեջանական խնձորի հայտնվելու փաստով քրեական գործ է հարուցվել: Պարզվել է, որ մեծ աղմուկ բարձրացրած ադրբեջանական խնձորների խմբաքանակը Հայաստան է ներկրվել ապօրինի ճանապարհով: ԱԱԾ-ն փորձում է բացահայտել մաքսանենգությանն առնչվող անձանց եւ պարզել ապօրինի ներկրման հանգամանքները:
Պետեկամուտների կոմիտեի ղեկավարն էլ հանձնարարել է սահմանային բոլոր անցակետերում վերահսկողությունը խստացնել՝ նման երեւույթի կրկնությունը բացառելու նպատակով: Հիշեցնենք, որ Երեւանի եւ մարզերի մի շարք սուպերմարկետներում եւ շուկաներում ադրբեջանական խնձոր էին հայտնաբերել: Քաղաքացիներն էին ահազանգել, իսկ հայտնաբերված խմբաքանակն առգրավվել ու ոչնչացվել է:
Արագածոտնում ողբերգական վթար է տեղի ունեցել: Volvo մակնիշի բեռնատարը Երեւան-Վանաձոր ավտոճանապարհին՝ Ուշիի ոլորաններում, դուրս է եկել ճանապարհի հանդիպակաց երթեւեկելի գոտի եւ մասամբ կողաշրջվել։ Վթարի հետեւանքով վարորդը՝ 51-ամյա Սեյրան Պապյանը, տեղում մահացել է։ Մեքենան բարձված է եղել ալյուրով:
Իսկ Արարատում մի երիտասարդ «ՎԱԶ 2106» մակնիշի մեքենայով պատահարի է ենթարկվել: Այգավան-Վանաշեն միջհամայնքային ճանապարհին 18-ամյա երիտասարդի վարած մեքենան դուրս է եկել երթեւեկելի գոտուց, կողաշրջվել եւ ընկել ջրատար առուն: Տղային անգիտակից վիճակում հիվանդանոց են տեղափոխել:
Մայիսի 2-ին արտարժույթի շուկայում գրանցվել են հետեւյալ փոխարժեքները. դոլարը 484 դրամ է, եվրոն՝ 529, ռուբլին՝ 8 դրամ 50 լումա, ֆունտը՝ 625 դրամ:
Մայիսի 3-ին հանրապետության շրջանների մեծ մասում ժամանակ առ ժամանակ սպասվում է անձրեւ եւ ամպրոպ: Օդի ջերմաստիճանը 2-3 աստիճանով կնվազի: Երեւանում նույնպես ժամանակ առ ժամանակ տեղումներ կլինեն: Մայրաքաղաքում գիշերը կդիտվի +10+12, ցերեկը՝ +21+23 աստիճան տաքություն: