Կառավարության նախաձեռնությամբ Ազգային ժողովի պատգամավորներն այսօր արտահերթ նիստի էին հավաքվել: Քննարկումները մեկնարկեցին նախարարների թվի կրճատման հարցով: Գործադիրն առաջարկում է կառավարության աշխատակազմի ղեկավար-նախարարի քաղաքական պաշտոնը փոխարինել աշխատակազմի ղեկավարի հայեցողական պաշտոնով: Արդյունքում 19-ի փոխարեն 18 նախարար կունենանք: Նիկոլ Փաշինյանը փորձում է հասկանալ, թե ինչ է փոխվելու:
Փաշինյանը նաեւ կարծում է, որ կառավարության կառուցվածքում փոփոխություն է արվում, քանի որ նախագահն ու վարչապետը չեն կարողացել համաձայնության գալ, թե ում են նշանակելու այդ պաշտոնում: Վստահեցնում է. խաչաձեւ հարցաքննությունից հետո նույնիսկ զեկուցողներն են խոստովանել, որ պատճառը քաղաքական է:
«Հեռուստատեսության եւ ռադիոյի մասին» օրենքում փոփոխությունն էլ իշխանական եւ ընդդիմադիր պատգամավորների միջեւ վիճաբանության առիթ դարձավ: Առաջարկվում է Հայաստանի տարածքում թվային ռադիոհեռարձակման անցնելու շրջանակում ռադիոհաճախականությունների նոր մրցույթներ հայտարարել: Ընդդիմադիր պատգամավորներին մտահոգում է այն, որ սրանով կարող է խախտվել խոսքի ազատությունը եւ որոշ անկախ ռադիոընկերություններ կտուժեն: Արման Սաղաթելյանը հակադարձեց. սա արվում է անվտանգության նկատառումներով: Սաղաթելյանի պարզաբանումը զայրացրեց Փաշինյանին: Պատգամավորը հորդորեց տեղի-անտեղի Թուրքիայի ու Ադրբեջանի մասին չխոսել, թե չէ ինքն էլ ամեն հարմար առիթով քառօրյա պատերազմի մասին կհիշի:
Էդուարդ Շարմազանովը չկարողացավ լռել. արտահերթ ելույթ ունեցավ, կողմերին հանդուրժողականության կոչ արեց, չմոռացավ նաեւ պատասխանել իշխանության մասին Փաշինյանի հայտարարությանը:
Եվ խորհրդարանականների կազմի փոփոխության մասին. «Ծառուկյան» դաշինքի խորհրդարանական խմբակցությունը երեք նոր պատգամավոր ունի: Դաշինքից Ալիկ Եղիկյանն ինքնաբացարկի դիմում էր ներկայացրել, Կենտրոնական ընտրական հանձնաժողովն էլ այսօր ուժը կորցրած է ճանաչել նրա մանդատը: Եղիկյանի փոխարեն պատգամավորի աթոռին կհայտնվի Գեւորգ Պետրոսյանը, իսկ մանդատը վայր դրած Հարություն Ղարագյոզյանին՝ Կարամելի Հարութին Ազգային ժողովում կփոխարինի Հակոբ Նազարյանը, Խաչիկ Մանուկյանին՝ Նորա Առուստամյանը:
Ի դեպ՝ Գեւորգ Պետրոսյանի մասին. ԲՀԿ նախկին նախագահ Նաիրա Զոհրաբյանի հետ նա խնդիրներ ուներ: Զոհրաբյանը նրան նույնիսկ հեռացրել էր կուսակցությունից: Այս պայմաններում ինչպե՞ս է Պետրոսյանն Ազգային ժողովում աշխատելու Զոհրաբյանի հետ:
Երեւանում է պաշտոնավարման ժամկետն ավարտող ԵԱՀԿ գլխավոր քարտուղար Լամբերտո Զանյերը: Շուտով գործունեությունը կավարտի նաեւ կազմակերպության երեւանյան գրասենյակը: Զանյերն ափսոսանք է հայտնել այդ առիթով. ասում է՝ Հայաստանի հետ հաճելի էր աշխատել: Բայց ԵԱՀԿ պաշտոնյան լավատես է. հույս ունի, որ կկարողանան Երեւանի հետ համագործակցության այլ ուղիներ գտնել:
ԵԱՀԿ երեւանյան գրասենյակը՝ վերջինը Հարավային Կովկասի տարածաշրջանում, կդադարի գործել օգոստոսի 31-ից: Պատճառն այն է, որ Ադրբեջանը, գրասենյակի կողմից իրականացվող ականազերծման ծրագրի պատրվակով, արգելափակեց գրասենյակի բյուջեն: ԵԱՀԿ-ում որոշումները կայացվում են կոնսենսուսով, բայց Բաքվին տարհամոզել կառույցի նախագահությունն այդպես էլ չկարողացավ: Էդվարդ Նալբանդյանը հավաստում է, որ կազմակերպության անդամ երկրներն այս կապակցությամբ եզրակացություններ արդեն արել են:
Ինչ վերաբերում է ԵԱՀԿ Մինսկի խմբի համանախագահների վերջին հայտարարությանը, որում վերջապես նշվել էր հրադադարը խախտող կողմը. Էդվարդ Նալբանդյանը կարծում է, որ հայտարարությունները, թեկուզ՝ հասցեական, արդեն արդյունք չեն տալիս: Հիմա, թերեւս, գործի անցնելու ժամանակն է: Եռանախագահները, ի դեպ, առաջիկա 10 օրերին Երեւան ու Ստեփանակերտ են այցելելու: Եթե առաջարկ հնչի, այդ ընթացքում կքննարկվի նաեւ Հայաստանի եւ Ադրբեջանի արտգործնախարարների, հետո նաեւ նախագահների հանդիպման հարցը:
Մոսկվայի մարզում փոթորկի հետեւանքով զոհերի թիվը հասել է 16-ի. 11 մարդ մահացել է Ռուսաստանի մայրաքաղաքում, եւս 5 զոհ կա Մերձմոսկվայում: Այստեղ նաեւ 34 տուժած կա, Մոսկվայում տուժածների թիվը հստակեցվում է։ Ընդհանուր առմամբ, բուժհաստատություններ է դիմել 168 մարդ, 108-ը դեռեւս հիվանդանոցում է: 8 անձի վիճակը մասնագետները ծանր են գնահատում:
Երկուշաբթի Մոսկվայում մոլեգնած փոթորիկն ուղեկցվել է հորդառատ անձրեւներով եւ ամպրոպով: Քամու արագությունը վայրկյանում հասել է 28-30 մետրի: Բնության տարերքը նաեւ ավերածություններ է առաջացրել: Ավելի քան 27 հազար ծառ է տապալվել, բազմաթիվ մեքենաներ, բնակելի եւ վարչական շենքերի տանիքներ են վնասվել: Մոսկվայում վտանգի «դեղին» աստիճան է հայտարարվել, ինչը նշանակում է, որ եղանակային պայմանների հետ կապված արտակարգ իրավիճակներ կարող են լինել:
Չելյաբինսկում երեկ հայտնաբերված ազգությամբ հայ հոր եւ որդու մահվան մասին նոր տվյալներ են հայտնի: Ռուսաստանի հայերի միությունը տեղեկացրել է, որ մահացած տղամարդը Ալիկ Հակոբյանն է: Նա դեռ մեկ ամիս առաջ՝ մայիսի 1-ին 2 տարեկան որդու հետ զբոսնելու էր դուրս եկել ու անհետացել: Մայիսի 28-ին քաղաքի փողոցներից մեկում բնակիչները ՎԱԶ մակնիշի կասկածելի մեքենա են նկատել: Ավտոմեքենայի հետեւի նստարանին էլ հայտնաբերել են հոր եւ որդու մարմինները: Իրավապահների նախնական տվյալներով՝ դիակների վրա բռնի մահվան հետքեր չկան: Որոշ տեղեկություններով էլ՝ տղամարդը մահացել է թմրանյութերի չափաբաժինը չարաշահելու հետեւանքով: Այժմ փորձում են հաստատել այս վարկածը, ինչպես նաեւ պարզել փոքրիկի մահվան պատճառը:
Մալաթիա-Սեբաստիա վարչական շրջանի շենքերից մեկում կրակոցներ են հնչել: Ահազանգի հետքերով դեպքի վայր ժամանած իրավապահները շենքի բակում որսորդական հրացանից կրակված պարկուճ են հայտնաբերել, եւս մեկ պարկուճ էլ գտել են բնակարաններից մեկի մուտքի մոտ: Վնասվել է նաեւ բնակարանի պատուհանի պաշտպանիչ ցանցը, հավանաբար՝ դրսից արձակված կրակոցի հետեւանքով: Իրավապահները բերման են ենթարկել կասկածյալին. նա 52-ամյա Սամվել Միքայելյանն է:
Իսկ Երեւանի Հաղթանակ թաղամասում՝ նախկին «Օրբիտա» գործարանի մոտակայքում գտնվող կիսակառույցում հրդեհ է բռնկվել: Վտանգավորության «Բիս 1» աստիճան է հայտարարվել: Կրակը բռնկվել է էլեկտրական սարքերի վերանորոգման արտադրամասում: Հրշեջները կրակը կարողացել են մարել շուրջ երեք ժամում:
Դոլարն ու եվրոն մայիսի 30-ին էժանացել են: Ամերիկյան արժույթի փոխարժեքն արդյունքում կազմել է 481 դրամ, եվրոյինը՝ 537, ռուբլունը՝ 8 դրամ 52 լումա, ֆունտինը՝ 619 դրամ:
Մայիսի 31-ին հանրապետության շրջանների որոշ հատվածներում սպասվում է անձրեւ եւ ամպրոպ: Օդի ջերմաստիճանը 1-2 աստիճանով կբարձրանա: Երեւանում նույնպես երեկոյան ժամերին կարճատեւ տեղումներ կլինեն: Մայրաքաղաքում գիշերը կդիտվի +15+17, ցերեկը՝ +29+31 աստիճան տաքություն: