Օգոստոսին Երեւանում օդի միջին ջերմաստիճանը միջինից մեկ աստիճանով բարձր է լինելու: Ըստ օդերեւութաբանական կենտրոնի պաշտոնական կանխատեսումների՝ ամսվա առաջին կեսն ավելի շոգ կլինի, որոշ օրերին օդի ջեմաստիճանը կհասնի մինչեւ 40 աստիճանի, իսկ ամսվա երկրորդ կեսին ջերմաստիճանը համեմատաբար կնվազի:
Նոր մանրամասներ են հայտնի դարձել Արմավիրի մարզպետի խորհրդականի սպանության գործով: Ձերբակալվածներ երկուսն են՝ Մանուկ Սիմոնյանի որդին եւ կինը: Նախնական քննությամբ՝ տվյալներ են ձեռք բերվել, որ կինը պարբերաբար բռնության է ենթարկվել ամուսնու կողմից: Հուլիսի 22-ի առավոտյան, կնոջ եւ ամուսնու միջեւ կրկին վիճաբանություն է տեղի ունեցել, ինչից հետո ամուսինը քնել է, եւ կինը փայտ կոտրելու կացնով հարվածել է քնած ամուսնուն, որը ստացած վնասվածքներից մահացել է: Այնուհետեւ կինը զանգահարել է որդուն եւ տուն կանչել, ապա միասին ամուսնու դիակը տեղափոխել եւ թաքցրել են Արմավիրի մարզի Դալարիկ գյուղին մոտակա ձորերում, որտեղ էլ 4 օր անց մահացածի մարմինը հայտնաբերել էին իրավապահները: Մանուկ Սիմոնյանի 46-ամյա կինը եւ 22-ամյա որդին ձերբակալված են:
Նորքի զինված խմբի գործով դատաքննությունը սկսվել է. այսօր մի քանի ժամ շարունակ մեղադրողը ընթերցել է մեղադրական եզրակացությունը: Ըստ այդ նյութերի՝ զինված խմբի պարագլուխ համարվող Արթուր Վարդանյանը 2014թ-ից սկսած ուղեւորություններ է կատարել Իսպանիա, Սիրիա, Լիբանան, Հայաստան, նա գործով ամբաստանյալ Հայր Անտոնից մաս-մաս գումար է վերցրել Հայաստանում զինված հեղաշրջում իրականացնելու համար, ընդհանուր գումարը կազմել է 60 հազար դոլար: Պարզվել է նաեւ, որ խմբի անդամները Արթուր Վարդանյանի հանձնարարությամբ լուսանկարել եւ տեսագրել են Հովիկ Աբրահամյանի, Լեւոն Տեր-Պետրոսյանի, Մրգաշեն գյուղում գտնվող Սեյրան Օհանյանի հայրական տները, դրանց մատույցները, Ռոբերտ Քոչարյանի աշխատավայրերը, ինչպես նաեւ ՀՀ նախագահի նստավայրը, Բարեկամության հրապարակը, Ֆրանսիայի հրապարակը, Հաղթանակ եւ Կիեւյան կամուրջները:
Երեւանում դժբախտ պատահար է տեղի ունեցել. շենքի 2-րդ հարկի պատշգամբից 2-ամյա երեխա է ընկել եւ բազմաթիվ կոտրվածքներ ստացել: Փոքրիկը ցած է ընկել տատիկի գրկից, նա այժմ հիվանդանոցում է, վիճակը ծանր է:
Հուրգադայում հարձակումից երկու շաբաթ անց հիվանդանոցում մահացել է Չեխիայի՝ ծանր վիրավորում ստացած քաղաքացին: Այսպիսով Հուրգադայի հարձակման զոհերի թիվը հասել է 3-ի: Հիշեցնենք, որ լողափին հանգստացողների վրա դանակով զինված հարձակման հետեւանքով նաեւ երկու հայուհի էր վիրավորվել, նրանցից մեկի վիճակը լավ է, մյուսը դեռ Վերակենդանացման բաժանմունքում է:
Նոյեմբերի 1-ից Երեւանում կարգելեն կեղտոտ ավտոմեքենաներով հաց եւ միս տեղափոխել: Գյուղնախարարության որոշման ահամաձայն, հացամթերքն ու թարմ միսը կթույլատրվի տեղափոխել միայն անհրաժեշտ հարամարավետություն ունեցող ավտոմեքենաներով: Հետագայում այս պահանջը կտարածվի նաեւ մարզերի վրա:
Դոլարի եւ եվրոյի փոխարժեքները նվազել են։ ԱՄՆ դոլարի փոխարժեքը հուլիսի 28-ին կազմել է 478, եվրոյինը՝ 560, բրիտանական ֆունտինը՝ 626, ռուսական ռուբլունը՝ 8.05 դրամ։
Հայաստանի տարածքում հուլիսի 29-ին սպասվում է առանց տեղումների եղանակ: Օդի ջերմաստիճանը հուլիսի 30-31-ը կնվազի 1-2 աստիճանով։ Երեւանում հուլիսի 29-ին սպասվում է առանց տեղումների եղանակ: Մայրաքաղաքում գիշերը կդիտվի +24+26, ցերեկը՝ +39+40 աստիճան տաքություն:
