Վերնիսաժի մոտ տեղի ունեցած սպանության մեջ կասկածվողներից մեկին հայտնաբերել են: Ձերբակալվել է հետախուզվող կասկածյալներից 60-ամյա Ռաֆիկ Խաչատրյանը: Մյուս հետախուզվողներին՝ 35-ամյա Ալբերտ Բլբուլյանին եւ 33-ամյա Արմեն Կարադավիդովին շարունակում են որոնել: Հիշեցնենք, որ սեպտեմբերի 14-ին Երեւանի կենտրոնում կրակոցներ են հնչել, ինչի հետեւանքով սպանվել է 43-ամյա Գարիկ Մոսինյանը, վիրավորվել՝ 39-ամյա Վահագն Աբգարյանը: Նրանք Ալավերդիից են, քրեական աշխարհի ներկայացուցիչներ:
Գյուղատնտեսության ոլորտում այս տարվա առաջին ութ ամիսներին արձանագրված անկումն անհանգստացնում է վարչապետին: Վերջին տվյալներով՝ 2017 թվականի հունվար-հուլիսին այս ոլորտում անկումը կազմել է 2.1 տոկոս: Կառավարության այսօրվա նիստում Կարեն Կարապետյանը հանձնարարել է ուսումնասիրել պատճառները:
Ազգային ժողովի պատգամավորներին էլ թույլ չեն տա ցանկացած պահի տեսակցել բանտարկյալներին, եթե, քննության շահերից ելնելով, քննիչը տեսակցությունների արգելք սահմանի: «Ելք»-ի պատգամավորներն առաջարկում էին, որ այդ արգելքը չտարածվի քրեակատարողական հաստատություններ առանց խոչընդոտի մտնելու իրավունք ունեցողների վրա՝ նախագահի, վարչապետի, Սահմանադրական դատարանի նախագահի, պատգամավորների եւ այլ պաշտոնյաների: Գործադիրը, սակայն, ուսումնասիրել է առաջարկն ու որոշել. քննիչի արգելքի դեպքում, նախկինի պես, բանտարկյալին տեսակցելու իրավունք կունենան միայն մարդու իրավունքների պաշտպանը կամ քահանան:
Հայաստանի նախագահն արդեն չի կարողանա որոշել տեղեկությունները պետական գաղտնիք որակելու եւ դրանք այլ երկրներին փոխանցելու կարգը: Փոփոխված Սահմանադրության պահանջի համաձայն՝ այդ գործառույթը կփոխանցվի կառավարությանն ու խորհրդարանին:
«Եվրանեսթ»-ի Խորհրդարանական վեհաժողովին մասնակցելու նպատակով Բաքվում է նաեւ հայկական պատվիրակությունը: Համաժողովի ընդմիջմանը Արմեն Աշոտյանն ու Մանե Թանդիլյանը հանդես են եկել մամուլի ասուլիսով, որի ընթացքում միջադեպ է գրանցվել: Բաքվում ապրող լրագրող, տխրահռչակ «Խաղաղության պլատֆորմի» ներկայացուցիչ Սյուզան Ջաղինյանը փորձել է սադրանքի դիմել եւ խափանել ասուլիսը, բայց չի հաջողվել: Ի՞նչ սադրանքի մասին է խոսքը, Ազգային ժողովի արտաքին հարաբերությունների հանձնաժողովում դեռեւս չեն մանրամասնում: Մինչ այդ նշենք, որ Սյուզան Ջաղինյանն Ադրբեջան է մեկնել 2016 թվականի վերջին: Այնտեղ նա մասնակցում է տարատեսակ միջոցառումների եւ ակտիվ քարոզչություն անում Հայաստանի իշխանությունների դեմ: Ի դեպ՝ ժամանակին անհայտ, բայց հիմա ճանաչում ձեռք բերած լրագրողը Հայաստանում դատապարտված է եղել՝ ահաբեկչության մասին կեղծ ահազանգ հնչեցնելու համար:
«Ժառանգություն»-ն այսօր նշել է հիմնադրման 15-ամյակը: Կուսակցության գրասենյակում կազմակերպված միջոցառմանը մասնակցել են «Ժառանգության» անդամները, ինչպես նաեւ «Ելք» դաշինքից Նիկոլ Փաշինյանն ու Էդմոն Մարուքյանը, դեսպանատների ներկայացուցիչներ: Հրավիրված է եղել նաեւ նախագահ Սերժ Սարգսյանը, սակայն նրանից պատասխան չեն ստացել: Հավաքին ներկա չեն եղել նաեւ «Ժառանգության» արդեն նախկին անդամներ Զարուհի Փոստանջյանը, Անահիտ Բախշյանը եւ Ստյոպա Սաֆարյանը: Նրանց բացակայության մասին հարցին Րաֆֆի Հովհաննիսյանն այդպես էլ հստակ պատասխան չի տվել:
Փոխարենը կուսակցության առաջնորդը խոսել է 2018 թվականի ապրիլից հետո սպասվող զարգացումների մասին՝ նշելով, որ «Ժառանգություն»-ն ամեն ինչ անելու է, որպեսզի Սերժ Սարգսյանին թույլ չտա վարչապետ դառնալ: Հովհաննիսյանը խոստացել է. այդ հարցով նախաձեռնություններ իրենցից կարելի է սպասել արդեն այս տարեվերջին:
Թուրքիայի նախագահի՝ Նյու Յորք այցի ժամանակ կրկին միջադեպ է գրանցվել: Ամերիկայի Թուրքական ազգային կոմիտեի անդամների առջեւ Էրդողանի ելույթի ժամանակ մի քանի մարդ բողոքի ակցիա է կազմակերպել: Նրանցից մեկն Էրդողանին ահաբեկիչ է կոչել եւ պահանջել «դուրս կորչել իր երկրից»: Սեւ կոստյումներով տղամարդիկ ցուցարարին հեռացնել են դահլիճից՝ այդ ընթացքում նաեւ հարվածելով նրա դեմքին: Էրդողանի կողմնակիցներն էլ հարձակվել են ակցիայի մասնակիցների վրա, քաշքշուկ է սկսվել, ընդհանուր առմամբ, հինգ մարդ է տուժել: Ամերիկյան պետքարտուղարությունը դեռեւս տեղեկություն չունի, արդյո՞ք միջադեպին Թուրքիայի նախագահի թիկնազորն է մասնակցել: Էրդողանի թիկնապահների մասնակցությամբ միջադեպ էր գրանցվել մայիսին, Թուրքիայի նախագահի՝ Վաշինգտոն կատարած այցի ժամանակ: Վերջինի թիկնազորը ծեծել էր ցույցի մասնակիցներին, ինչի հետեւանքով մեկ տասնյակից ավելի մարդ էր տուժել:
Երեւանում է Հայոց Ցեղասպանության մասին «Խոստում» ֆիլմի ռեժիսոր Թերրի Ջորջը: Նա երկրորդ անգամ է Հայաստան այցելել: Առաջին անգամ եկել էր՝ ֆիլմի համար ուսումնասիրություններ կատարելու, իսկ այսօր արդեն ժապավենն էկրաններին է: Ռեժիսորն իր ֆիլմը ստացված է համարում: Ասում է՝ բազմաթիվ մարդիկ ֆիլմը դիտելուց հետո զարմանքով նշել են, որ ոչինչ չգիտեին Հայոց ցեղասպանության, ինչպես նաեւ այն մասին, որ Թուրքիայի կառավարությունը մինչեւ հիմա ժխտում է այդ փաստը: Նշանակում է՝ ասելիքը տեղ է հասել: Թերրի Ջորջն ընդգծել է, որ «Խոստում» ֆիլմի միջոցով փորձել են ուշադրություն հրավիրել փախստականների խնդրին, որն այսօր էլ արդիական է: «Այս ֆիլմը նկարել ենք ոչ թե մեկ ամսվա, այլ 100 տարվա համար»,- հավելել է ռեժիսորը:
Սեպտեմբերի 22-ին դոլարն աննշան աճել է, իսկ ֆունտը կտրուկ թանկացել է: Արդյունքում դոլարի փոխարժեքը կազմել է 478 դրամ, ֆունտինը՝ 648, եվրոյինը՝ 574 դրամ, ռուբլունը՝ 8 դրամ 31 լումա:
Սեպտեմբերի 23-ին հանրապետության հյուսիսային շրջաններում սպասվում է անձրեւ եւ ամպրոպ: Բարձր հրդեհավտանգ իրավիճակը կպահպանվի: Օդի ջերմաստիճանն աստիճանաբար 3-4 աստիճանով կնվազի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +17+19, ցերեկը՝ +31+33 աստիճան տաքություն:
