Պարտադիր զինծառայությունից խուսափած երիտասարդները քրեական հետապնդման չեն ենթարկվի, բայց ստիպված կլինեն 3 մլն 600 հազար դրամ վճարել. բաց թողած յուրաքանչյուր զորակոչի համար՝ 200 հազար դրամ: Ազգային ժողովն այսօր միաձայն քվեարկել է համապատասխան օրենքում փոփոխությունների օգտին: «Ելք»-ը, սակայն, կողմ է քվեարկել պայմանով, որ երկրորդ ընթերցման ժամանակ կառաջարկի նվազեցնել տուգանքի չափը կամ ընդհանրապես հանել այն: Պաշտպանության նախարարությունը, ի դեպ, առաջարկել էր այլեւս թույլ չտալ գումար վճարելով խուսափել զինծառայությունից: Առաջարկը, սակայն, մերժվել է: Փոփոխության կողմնակիցները հույս ունեն, որ երիտասարդներն առանց պատասխանատվությունից վախենալու հայրենիք կվերադառնան:
Իսկ Քրեական օրենսգրքով բժիշկների նկատմամբ բռնություն կատարողների պատիժը խստացնելու նախագծի շուրջ քննարկումը բավական թեժ է անցել: Փոփոխության ընդդիմախոսները դեմ են օրենսգրքում առանձին մասնագիտության համար պատասխանատվություն նախատեսելուն: Նաիրա Զոհրաբյանը դեմ է բժիշկներին առանձնացնելուն, հատկապես, որ ոլորտում բազմաթիվ անբարեխիղճ մասնագետներ կան: Պատգամավորը նույնիսկ լրագրողական անցյալն է հիշել՝ նշելով, որ ինքն էլ առաջարկելու է լրագրողների նկատմամբ բռնությունների մասին կետ ավելացնել:
Մասնագիտությամբ բժիշկ խորհրդարանի խոսնակը նեղացած տոնով է արձագանքել: Արա Բաբլոյանը հասկանում է, որ մարդիկ բժշկի են դիմում դժվարին ու ծանր հոգեբանական վիճակում, բայց դա, նրա կարծիքով, չի նշանակում, որ կարելի է ծեծել բժշկին: Նախագիծը, ամեն դեպքում, ընդունվել է 55 կողմ, 2 դեմ եւ 23 ձեռնպահ ձայնով: Ուշագրավ է, որ դեմ քվեարկողները հանրապետական պատգամավորներ էին՝ Արթուր Գեւորգյանն ու Միհրան Պողոսյանը։
Հաջորդ շաբաթ Բրյուսելում կայանալիք Արեւելյան գործընկերության գագաթնաժողովի վերջնական հռչակագիրը կրկին փակուղում է հայտնվել: Պատճառը ղարաբաղյան հիմնախնդիրն է: Պաշտոնական Երեւանն ու Բաքուն դեռեւս համաձայնության չեն եկել հակամարտությանը վերաբերող ձեւակերպումների շուրջ:
Բրյուսելում մտահոգված են, քանի որ նույն իրավիճակն է եղել նաեւ 2015 թվականին: Ադրբեջանի նախագահ Իլհամ Ալիեւը հրաժարվել է մասնակցել գագաթնաժողովին, իսկ այդ երկրի արտգործնախարարը ժամեր շարունակ չէր ստորագրում հռչակագիրը: Եվրամիությունում մտավախություն ունեն, որ պատմությունը կարող է կրկնվել: Դրանից խուսափելու համար Բրյուսելում որոշել են անվանական չառանձնացնել որեւէ հակամարտություն: Ենթադրվում է, որ այս անգամ կբավարարվեն միայն հակամարտությունները խաղաղ ճանապարհով կարգավորելու ուղղությամբ ջանքերն ակտիվացնելու կոչով: ԱԳ նախարար Էդվարդ Նալբանդյանն այսօր խուսափել է մեկնաբանել գագաթնաժողովի հռչակագրի բովանդակությունը: Բանակցությունները, նախարարի խոսքով, դեռ շարունակվում են: Ասում է՝ այս դեպքում խոսքն ավելի շուտ ոչ թե Հայաստանի եւ Ադրբեջանի, այլ Ադրբեջանի եւ եվրոպական կառույցների մոտեցումների տարբերության մասին է: Իսկ ԵՄ-ն ղարաբաղյան հակամարտության կարգավորման հարցում մշտապես աջակցում է համանախագահ երկրների ջանքերին:
Ադրբեջանում երկու օրվա ընթացքում երրորդ երկրաշարժն է գրանցվել: Նոյեմբերի 17-ին 4.5 մագնիտուդով երկրաշարժ է տեղի ունեցել ադրբեջանական Աղջաբադ քաղաքից 20 կմ հեռավորությամբ: Էպիկենտրոնում ստորգետնյա ցնցումների ուժգնությունը կազմել է 5-6 բալ: Նոյեմբերի 16-ի երկրաշարժի ուժգնությունը կազմել է 3.4 մագնիտուդ: Ստորգետնյա ցնցումները զգացվել նաեւ Հայաստանում եւ Արցախում: Իսկ նոյեմբերի 15-ի երկրաշարժի հետեւանքով Ստեփանակերտում տուն է վնասվել: Տանը ոչ ոք չի եղել. 70-ամյա սեփականատերը տարեցների ինտերնատում է բնակվում: Ստորգետնյա ցնցումների հետեւանքով վնասվել էր նաեւ Տիգրանակերտի ամրոցի՝ 1970 թվականին կառուցված մասը:
Սերգեյ Մինասյանն ի վերջո դեսպանի պաշտոն ստացավ: Նախագահի հրամանագրով քաղաքագետը նշանակվել է Ռումինիայում Հայաստանի դեսպան: Տեւական ժամանակ լուրեր էին շրջանառվում, որ Մինասյանը դեսպան է նշանակվելու հարեւան Վրաստանում: Այս մասին գրվում էր որպես որոշված փաստի մասին, սակայն վրացական կողմը երկար ժամանակ ձգձգում էր ագրեմանի տրամադրումը: Ի վերջո Թբիլիսին որոշեց չընդունել Սերգեյ Մինասյանին: Նրա փոխարեն Վրաստանում Հայաստանի դեսպան նշանակվեց Ազգային ժողովի նախկին պատգամավոր Ռուբեն Սադոյանը:
Ալեքսիս Օհանյանն ու Սերենա Ուիլյամսն ամուսնացել են: Ամերիկահայ գործարարի եւ ամերիկացի թենիսիստուհու հարսանիքը տեղի է ունեցել նոյեմբերի 16-ին Նյու Օռլեանում: Հյուրերի թվում բազմաթիվ հայտնիներ են եղել, իսկ հարսանիքի համար զույգն ավելի քան 1 մլն դոլար է ծախսել: Նշենք, որ Reddit կայքի համահիմնադիր Օհանյանն ու «Մեծ սաղավարտի» մրցաշարերի 23-ակի հաղթող Ուիլյամսն ամիսներ առաջ դուստր են ունեցել, որին Ալեքսիս Օլիմպիա են կոչել: Հավելենք, որ 36-ամյա Սերենան աշխարհի ամենահարուստ մարզիկներից է համարվում, իսկ 34-ամյա Ալեքսիսը երկու տարի անընդմեջ ներառվել է Forbes-ի ՏՏ ոլորտի վարկանիշում՝ որպես տեխնոլոգիական աշխարհի ազդեցիկ ներկայացուցիչ:
Դոլարը շարունակում է արժեզրկվել: Նոյեմբերի 17-ին դոլարի փոխարժեքը կազմել է 486 դրամ, եվրոյինը՝ 574, ռուբլունը՝ 8 դրամ 17 լումա, ֆունտինը՝ 644 դրամ:
Նոյեմբերի 18-ին հանրապետությունում սպասվում է առանց տեղումների եղանակ, 19-ի երեկոյան ժամերին՝ անձրեւ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +3+5, ցերեկը՝ +14+16 աստիճան տաքություն: