ԵՏՄ-ից դուրս գալու հարցով խորհրդարանական լսումներն այսօր բավական հանգիստ մթնոլորտում են անցել: Լսումները նախաձեռնել էր «Ելք» խմբակցությունը, որը նախկինում նույնպես փորձել էր այս հարցը խորհրդարանի օրակարգ մտցնել, սակայն չէր հաջողել:
Շուրջ 4 ժամ տեւած լսումների ժամանակ ԵՏՄ-ից դուրս գալու կողմնակիցները փաստեր են ներկայացրել՝ փորձելով հիմնավորել, թե որքան սխալ էր այդ միության հետ համաձայնագիր կնքելը: Օրինակ՝ ԵՏՄ-ին անդամակցության 3 տարիների ընթացքում Հայաստանի ՀՆԱ-ն կրճատվել է 8%-ով, զբաղվածության մակարդակը՝ 13%-ով, պետական պարտքն աճել է 10%-ով, 2017 թվականին Հայաստանից դեպի Ռուսաստան 25 մլն դոլարի դրամական հոսք է տեղի ունեցել, իսկ ռուսական կողմի ներդրումները Հայաստանում այս տարի գրեթե զրոյական են: «Ելք»-ի անդամները նաեւ հիշեցրել են 900 անուն ապրանքի թանկացման մասին, որովհետեւ հունվարի 1-ից գործելու է միասնական տուրքի համակարգը:
Ընդդիմադիրներն առաջարկել են հրաժարվել ԵՏՄ-ին անդամակցությունից եւ խորացնել հարաբերությունները Եվրամիության հետ, որի հետ օրեր առաջ Հայաստանը ստորագրեց Համապարփակ եւ ընդլայնված գործընկերության մասին համաձայնագիրը: Հնչեցված քննադատություններին ի պատասխան՝ Հանրապետական խմբակցության պատգամավորները հիշեցրել են. ԵՏՄ-ն համապատասխանում է Հայաստանի քաղաքական օրակարգին, իսկ ԵՄ-ի հետ կնքված նոր համաձայնագիրն ապացուցեց, որ Հայաստանի իշխանությունների «ե՛ւ, ե՛ւ»-ի քաղաքականությունն արդարացրեց բոլոր սպասումները:
Սամվել Բաբայանի ու մյուսների գործով դատավարությունն ավարտվեց. վաղը դատարանը հրապարակելու է դատավճիռը: Իսկ այսօրվա դատական նիստին խոսել է Սամվել Բաբայանը: Նա հիշեցրել է գործով ցուցմունքներից մի քանի մանրամասներ՝ պնդելով, որ «Իգլա»-ի գործով իրեն առաջադրված մեղադրանքը չի համապատասխանում իրականությանը։
Բաբայանն անդրադարձել է նաեւ դատախազի՝ մեղադրական ճառում արտահայտված տարակուսանքին, թե ինքն «Իգլան» չի տարբերում «տրուբայից»: Հեգնել է. այն ժամանակ Արամ Արամյանը, երեւի, փոքր է եղել, չգիտի, թե իր ղեկավարած օպերացիաների ժամանակ քանի անգամ են «Իգլա»-ով ինքնաթիռ եւ ուղղաթիռ խփել: Ինչ վերաբերում է փողերի լվացման մեղադրանքին. Բաբայանը պնդել է, որ քրեական տարր պարունակող որեւէ քայլ չի կատարել: Իրեն պարտք են եղել, ուղարկել են: Այո, այդ հարցով գործ հարուցվել է, բայց հենց սկզբից ոչ ոք կասկած չի հայտնել, որ դա իր գումարն է: Հիշեցնենք, որ Սամվել Բաբայանը մեղադրվում է մի խումբ անձանց հետ անօրինական ճանապարհով Վրաստանից Հայաստան «Իգլա» տեսակի զինահրթիռային համալիրի խողովակ տեղափոխելու, ինչպես նաեւ փողերի լվացման մեջ։
Ռուսաստանի Արմավիր քաղաքի ռեստորանում հրաձգություն է տեղի ունեցել: Միջադեպի հետեւանքով 3 մարդ է զոհվել, այդ թվում՝ Ռոսգվարդիայի մեկ աշխատակից ու տեղացի գործարար, որոշ տվյալներով՝ քրեական հեղինակություն Անդրեյ Սարայանը: Ըստ տեղեկությունների՝ Ռոսգվարդիայի գնդապետ Պյոտր Լոմակինը փորձել է բաժանել վիճաբանության մասնակիցներին, սակայն զոհվել է արձակված կրակոցից: Լրատվամիջոցների տեղեկություններով՝ վեճը ծագել է կնոջ պատճառով եւ վերածվել հրաձգության: Վիճաբանության 4 մասնակիցներից 3-ը զոհվել են, իսկ չորրորդը՝ Անդրեյ Սարայանի ընկեր Մուխթար Մալսյուգենովը, փախուստի է դիմել: Նրան որոնում են:
Երեւանում նոյեմբերի 26-ին արտակարգ դեպք է տեղի ունեցել. կեսգիշերն անց դանակահարված 4 երիտասարդներ հիվանդանոց են տեղափոխվել: Բուժհաստատություն են տեղափոխվել Գյումրու 24-ամյա բնակիչ Նորայր Պետրոսյանը, Երեւանի 24-ամյա բնակիչ Հրաչ Սարգսյանը, Արագածոտնի Վերին Սասնաշեն գյուղի 25-ամյա բնակիչ Հակոբ Մարտիրոսյանը եւ Կոտայքի Զովունի գյուղի 24-ամյա բնակիչ Արթուր Ավագյանը: Պարզվել է, որ վիճաբանություն է տեղի ունեցել, երիտասարդներին դանակահարողը ներկայացել է ոստիկանություն: 22-ամյա Վիգեն Ա.-ն խոստովանել է, որ իրենց շենքի բակում ծագած վիճաբանության ժամանակ ինքն է դանակահարել տուժածներին: Նա ձերբակալվել է:
Թբիլիսիում տեղի ունեցավ «Մանկական Եվրատեսիլ» երգի մրցույթը: Այս տարի այն անցկացվում էր «Շողա պայծառ» նշանաբանի ներքո: Մրցույթի հաղթող ճանաչվեց Ռուսաստանը ներկայացնող Պոլինա Բոգուսեւիչը՝ «Թեւեր» երգով: Երկրորդ տեղը զբաղեցրեց Վրաստանը, երրորդը՝ Ավստրալիան: «Մանկական Եվրատեսիլ 2017»-ին Հայաստանը ներկայացնում էր 9-ամյա Միշան՝ «Բումերանգ» երգով: Փոքրիկ երգիչը 148 միավոր վաստակեց եւ զբաղեցրեց 6-րդ հորիզոնականը:
Նշենք, սակայն, որ քվեարկության արդյունքների հաշվարկի ընթացքում որոշակի խնդիրներ են առաջացել: Բանն այն է, որ այս տարի առաջին անգամ առցանց քվեարկելու իրավունք ուներ նաեւ հանդիսատեսը: Ընդ որում՝ կարելի էր քվեարկել նաեւ սեփական երկրի ներկայացուցչի օգտին, իսկ քվեները հաշվվել են 50/50 սկզբունքով: Առցանց քվեարկության հետ կապված խնդիրներ են եղել, բայց դա Եվրոպական հեռարձակողների միությանը չի խանգարել ձայների հաշվարկ կատարել: Ժյուրիի քվեարկությամբ Միշան հայտնվել է երրորդ հորիզոնականում, բայց, փաստորեն, հանդիսատեսի ոչ բոլոր քվեներն են գրանցվել: Հավելենք նաեւ, որ այս տարի «Մանկական Եվրատեսիլ»-ին մասնակցում էին պատանի կատարողներ 16 երկրից:
Դոլարն ու եվրոն դեռեւս ամրապնդում են դիրքերը: Նոյեմբերի 27-ին դոլարի փոխարժեքը կազմել է 484 դրամ, եվրոյինը՝ 577, ռուբլունը՝ 8 դրամ 22 լումա, ֆունտինը՝ 646 դրամ:
Նոյեմբերի 28-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -5-7 աստիճան ցուրտ, ցերեկը՝ +6+8 աստիճան տաքություն:
