Ադրբեջանի Գերագույն դատարանն ուժի մեջ է թողել NIDA շարժման ակտիվիստ Ղիյաս Իբրահիմովի դատավճիռը։

Turan–ի  հետ զրույցում ակտիվիստի փաստաբան Զիբեյդա Սադիքովան հայտնել է, որ Իբրահիմովը սեփական ցանկությամբ չի մասնակցել վճռաբեկ բողոքի լսումներին։ Փաստաբանը նշել է, որ կալանքից հետո իր պաշտպանյալը կտտանքների է ենթարկվել եւ նախնական ցուցմունքները տվել է ֆիզիկական ճնշման տակ։

Պաշտպանող կողմը Գերագույն դատարանին խնդրել էր չեղարկել Բաքվի վերաքննիչ դատարանի վճիռը եւ կարճել քրեական գործը արդարացնելով պաշտպանյալին։ Պաշտպանող կողմը մտադիր է դիմել ՄԻԵԴ։ Ստրասբուրգի դատարանին արդեն կալանքի բողոքարկման եւ Իբրահիմովի դեմ խոշտանգումների մասին բողոք է ներկայացվել։

Հիշեցնենք, որ NİDA շարժման ակտիվիստներ Ղիյաս Իբրահիմովը եւ Բայրամ Մամեդովը կալանավորվել էին այն բանի  համար, որ Հեյդար Ալիեւի հուշարձանի վրա քաղաքական կարգախոսեր էին գրել։ Սակայն նրանց մեղադրել են թմրանյութերի ապօրինի շրջանառության մեջ եւ դատապարտել 10 տարվա ազատազրկման։