Կատալոնիայի՝ Բելգիա փախած նախկին առաջնորդ Կարլես Պուչդեմոնը պնդում է, որ նոր տեխնոլոգիաների շնորհիվ տարածաշրջանը կարելի է կառավարել Բրյուսելից: Այս մասին նա ասել է Catalunya Radio ռադիոկայանի հետ հարցազրույցում, փոխանցում է «ՏԱՍՍ»-ը:
Ըստ Կատալոնիայի նախկին ղեկավարի՝ «այսօր խոշոր բիզնես ծրագրերը կառավարվում են նոր տեխնոլոգիաների կիրառմամբ»: «Դրանք այն նորմալ պայմանները չեն, որոնք մեզ դուր են գալիս, սակայն սա ավելի լավ է, քան բանտից կառավարելը»,- ասել է Փուչդեմոնը: Նա գտնում է, որ «խորհրդարանի կանոնակարգերում չկա որեւէ դրույթ, որը կարող է խոչընդոտել պաշտոնը ստանձնելու այն միջոցներին», որոնք առաջարկում են ինքնավարության նախկին առաջնորդի կողմնակիցները:
Քաղաքական գործիչը շեշտել է, որ Կատալոնիայի խորհրդարանի ղեկավար մարմինը պետք է որոշի`արդյո՞ք նա կարող է հավակնել տարածաշրջանային առաջնորդի պաշտոնին: «Ճիշտ չէ, որ ես փախել եմ արդարադատությունից: Ես այստեղ ազատ եմ եկել, իսկ երբ հայտարարվեց իմ կալանքի մասին եվրոպական որոշումը, ես Բրյուսելում դատարանի առջև կանգնեցի, իսկ հետո իսպանական կառավարությունը հեռացրեց ինձ»,- վստահեցրել է Պուչդեմոնը: