Կորեայի հանրապետության նախագահ Մուն Չժե Ինը փետրվարի 10-ին Սեւոլում հանդիպում է ունեցել Հյուսիսային Կորեայի պատվիրակության հետ, որը մասնակցում է Ձմեռային օլիմպիական խաղերի բացման արարողությանը Փհենչհանում: Բանակցությունների գլխավոր պահերից մեկը Հյուսիսային Կորեայի առաջնորդի նամակի փոխանցումն ու Հարավային Կորեայի նախագահին Փհենյան հրավիրելն էր կարճ ժամկետներում երկկողմ գագաթաժողով անցկացնելու նպատակով, հաղորդում է ՏԱՍՍ-ը:
Մուն Չժե Ինը, նախագահի աշխատակազմի ներկայացուցչի փոխանցմամբ, ի պատասխան հայտարարել է, որ իր այցը Փհենյան հնարավոր կլինի, երբ կստեղծվեն անհրաժեշտ պայմաններ:
Ներկայացուցիչը նաեւ հավելել է, որ խորհրդակցությունների ժամանակ պայմանավորվածություն է ձեռք բերվել առաջ մղել Հյուսիսի եւ Հարավի միջեւ երկխոսությունը կապերի ամրապնդման նպատակով:
Նշենք, որ մինչեւ Հարավային Կորեա այցելելը ԱՄՆ-ի փոխնախագահ Մայք Փենսը եղել է Տոկիոյում, որտեղ հայտարարել էր, որ մոտ ժամանակներս Վաշինգթոնը կհրապարակի Հյուսիսային Կորեայի դեմ «կոշտ եւ ագրեսիվ» տնտեսական պատժամիջոցների նոր շարք, որի նպատակն է ստիպել Հյուսիսային Կորեային դադարեցնել միջուկային զենքի ու բալիստիկ հրթիռի զարգացման ծրագիրը:
