Ռուսաստանի Դաշնային խորհրդի միջազգային հարցերի հանձնաժողովի նախագահն արտասովոր ոչինչ չի տեսնում Ադրբեջանին 5 մլրդ դոլար արժողությամբ զենքի վաճառքի հարցում: Կոնստանտին Կոսաչեւն այսօր Երեւանում լրագրողներին ասել է, որ պարզապես կնքված պայմանագրով ստանձնած պարտավորություններն են կատարում: Հարցին, թե Մոսկվան վրդովված է Ուկրաինային զենք վաճառելու փաստի առիթով, բայց ինքն է զենք վաճառում իր ռազմավարական գործընկեր Հայաստանի հակառակորդ պետությանը, Կոսաչովը բացատրել է, որ Ուկրաինայի դեպքում խոսքը «թեժ» փուլում գտնվող հակամարտության մասին է, որտեղ զենք է կիրառվում: Ամեն դեպքում, ռուսաստանցի պաշտոնյան չի բացառում, որ 2016 թվականի ապրիլյան իրադարձություններից հետո Ադրբեջանին սպառազինության մատակարարումները նման ծավալ չեն ունենա:
Մահացել է աշխարհահռչակ ֆիզիկոս, տիեզերագետ Սթիվեն Հոքինգը: Անգլիացի գիտնականը 76 տարեկան էր: 21 տարեկանում Հոքինգի մոտ կողմնային ամիոտրոֆիկ սկլերոզ՝ Լու Գերիգի հիվանդություն են ախտորոշում. բժիշկները վստահ էին, որ 3 տարուց ավելի չի ապրի: Ֆիզիկոսն ամբողջությամբ զրկված էր շարժունակությունից, խոսում էր այտերի մկանների օգնությամբ: Նա սիրում էր ասել. «Որտեղ կա կյանք, կա նաեւ հույս»: Թերեւս, այս համոզմունքն էլ նրան օգնեց հաղթել կանխորոշված վաղաժամ մահվանը:
Սթիվեն Հոքինգը հավատում էր այլմոլորակայինների գոյությանը, ավելին, նրանց մեջ սպառնալիք էր տեսնում Երկրի բնակչության գոյության համար: Նա զբաղվում էր Տիեզերքի նախնական վիճակի խնդրի հետազոտությամբ. Մեծ պայթյունի տեսության համաձայն՝ այն անընդհատ ընդարձակվում է: Գիտնականին համբավ բերեց «Ժամանակի կարճ պատմությունը» աշխատությունը: Հոքինգը երկու անգամ ամուսնացած է եղել, 3 երեխա ունի:
Անգելա Մերկելը չորրորդ անգամ անընդմեջ Գերմանիայի կանցլեր է ընտրվել: Քրիստոնեա-դեմոկրատական միության ղեկավարի թեկնածությանը կողմ է քվեարկել Բունդեսթագի 364 պատգամավոր, դեմ՝ 315-ը: Երկրի նախագահ Ֆրանկ-Վալտեր Շթայնմայերն արդեն հաստատել է նրա նշանակումը: Նշենք, որ Անգելա Մերկելը Գերմանիայի դաշնային կանցլերի պաշտոնը զբաղեցնում է 2005 թվականից: Անցյալ տարվա սեպտեմբերին կայացած Բունդեսթագի ընտրություններից հետո շուրջ կես տարի Գերմանիայում քաղաքական ճգնաժամ էր. քրիստոնեա-դեմոկրատներն ու սոցիալ-դեմոկրատները երկար ժամանակ չէին կարողանում կոալիցիա կազմելու հարցում համաձայնության գալ: Ավելի ուշ՝ Սոցիալ-դեմոկրատական միության ղեկավարի փոփոխությունից հետո միայն, այստեղ որոշեցին կոալիցիա կազմել Մերկելի կուսակցության հետ:
Մեծ Բրիտանիան դադարեցնում է Ռուսաստանի հետ երկկողմ շփումները, ինչպես նաեւ չեղարկում Սերգեյ Լավրովին ուղարկված Լոնդոն այցելելու հրավերը: Այս մասին հայտարարել է Թերեզա Մեյը՝ ընդգծելով, որ պատճառը ռուսական գլխավոր հետախուզության վարչության նախկին գնդապետ Սերգեյ Սկրիպալի թունավորման դեպքն է. Սկրիպալի եւ նրա դստեր թունավորման համար Լոնդոնը Մոսկվային է մեղադրում:
«Սկրիպալի գործի» պատճառով նաեւ Մեծ Բրիտանիայից 23 ռուսաստանցի դիվանագետ կարտաքսվի: Բացի այդ, Լոնդոնը կուժեղացնի մասնավոր օդանավերի հսկողությունը, կխստացնի մաքսատան ստուգումները, իսկ Մեծ Բրիտանիայի թագավորական ընտանիքի անդամներն ու բարձրաստիճան պաշտոնյաները չեն մասնակցի Ռուսաստանում անցկացվելիք Ֆուտբոլի աշխարհի առաջնությանը:
Մոսկվան խոստացել է առաջիկայում արձագանքել Մեյի հայտարարությանը: Հիշեցնենք, որ նախկին լրտես Սկրիպալը եւ նրա դուստրը թունավորվել են մարտի 4-ին, անգլիական Սոլսբերի քաղաքի առեւտրի կենտրոններից մեկում: Նրանք ծայրահեղ ծանր վիճակում հիվանդանոցում են: Սկրիպալը Ռուսաստանում 2006 թվականին դատապարտվել է Մեծ Բրիտանիայի օգտին լրտեսելու համար, իսկ 2010-ին ներում ստացել եւ Մեծ Բրիտանիա տեղափոխվել:
Ռուսաստանում «Իսլամական պետություն» ահաբեկչական խմբավորման կողմնակիցների հավաքագրող խմբի 60 անդամ է ձերբակալվել: Անվտանգության դաշնային ծառայության տվյալներով՝ հավաքագրվածներին պատրաստվում էին ուղարկել Սիրիա եւ Իրաք՝ ռազմական գործողությունների մասնակցելու նպատակով: 17 հասցեներում խուզարկություների ընթացքում նաեւ երեք լաբորատորիա են հայտնաբերել, որտեղ կեղծ փաստաթղթեր են պատրաստվել: Առգրավվել են մեծ թվով կնիքներ, պետական սահմանի հատման դրոշմակնիքներ, օտարերկրյա պետությունների անձնագրեր: Սիրիա եւ Իրաք զինյալների ուղարկելուց բացի՝ խմբի անդամները նաեւ Կենտրոնական Ասիայից Ռուսաստան ժամանած ապօրինի միգրանտների կեցության օրինականացման գործով են զբաղվել:
Կենտրոնական բանկի շենքի մոտ մարտի 10-ին տեղի ունեցած մահացու վրաերթի գործով 26-ամյա տղամարդ է ձերբակալվել: Նա Ժորա Վարդանյանն է, որի փոխարեն իրավապահներին այլ անձ էր ներկայացել՝ 42-ամյա Լեւոն Արեստակեսյանը: Վերջինն ազատ է արձակվել: Հիշեցնենք, որ մարտի 10-ի երեկոյան Ժորա Վարդանյանը Mercedes մակնիշի մեքենայով մահացու վրաերթի էր ենթարկել 75-ամյա Մարիա Գրիգորյանին եւ կնոջն անօգնական թողնելով՝ փախուստի դիմել: 26-ամյա երիտասարդը «Մարիաննա» ընկերության սեփականատեր Տիգրան Վարդանյանի որդին է: Մեքենան, որում նաեւ Ժորա Վարդանյանի անվամբ հաշվառված «Մակարով» տեսակի ատրճանակ է հայտնաբերվել, գրանցված է հոր ընկերության հաշվեկշռում:
Ռուս գեղանկարիչ Միխայիլ Վրուբելի «Դեւը եւ հրեշտակը Թամարայի հոգու հետ» հանրահայտ նկարը վերադարձավ Հայաստան: Այն 23 տարի առաջ՝ 1995 թվականին գողացել էին Երեւանի Ռուսական արվեստի թանգարանից: Նկարի հայտնաբերման եւ Հայաստանին վերադարձնելու մասին Մոսկվայում հայտարարել էին Հայաստանի եւ Ռուսաստանի նախագահները: Ռուսական արվեստի թանգարանում այս առիթով «Գողացած Վրուբելի վերադարձը» խորագրով ցուցահանդես է բացվել: Ի դեպ՝ նկարչի հայտնի ստեղծագործության վերադարձը նշանավորվելու է մշակութային եւս մեկ իրադարձությամբ. Սպենդիարյանի անվան օպերայի եւ բալետի ազգային ակադեմիական թատրոնում առաջիկայում կներկայացվեն հատվածներ Ռուբինշտեյնի հանրահայտ «Դեւը» օպերայից: Նշենք նաեւ, որ նկարը վերականգնած Մոսկվայի Տրետյակովյան պատկերասրահի մասնագետ Իննա Սոլովովային մշակույթի նախարար Արմեն Ամիրյանը պարգեւատրել է նախարարության Ոսկե մեդալով:
Մարտի 14-ին դոլարի անկումը շարունակվել է, իսկ եվրոն սկսել է արժեւորվել: Դոլարի փոխարժեքը կազմել է 480 դրամ, եվրոյինը՝ 594, ռուբլունը՝ 8 դրամ 44 լումա, ֆունտինը՝ 670 դրամ:
Մարտի 15-ին հանրապետության շրջանների զգալի մասում սպասվում է կարճատեւ անձրեւ եւ ամպրոպ: Օդի ջերմաստիճանն էապես չի փոխվի: Երեւանում նույնպես ժամանակ առ ժամանակ տեղումներ կլինեն: Մայրաքաղաքում գիշերը կդիտվի +5+7, ցերեկը՝ +16+18 աստիճան տաքություն: