Ապրիլի 9-ից Հայաստանն ամբողջությամբ անցավ կառավարման խորհրդարանական համակարգի, եւ սահմանված կարգի համաձայն՝ կառավարության նիստն այսօր անցկացվել է փակ դռների հետեւում: Նախկինում լրագրողները հատուկ սրահից մոնիթորների օգնությամբ հետեւում էին նիստին, իսկ դրանից հետո կառավարության անդամներին հարցեր ուղղելու հնարավորություն ունենում, հարկ եղած դեպքում՝ նաեւ նիստում քննարկված հարցերի մասին: Հիմա կառավարությունն ինքն է որոշում, թե որ գերատեսչության ղեկավարը պետք է նիստից հետո հանդիպի լրագրողներին: Օրինագծի քննարկման ժամանակ հեղինակները վստահեցնում էին, որ դա չի խոչընդոտի լրագրողների աշխատանքին, փոխարենը կառավարության նիստերում քննարկումներն ավելի առարկայական ու արդյունավետ կդառնան: Այսօր Սուրեն Կարայանը վստահեցրել է, որ կառավարությունը միշտ էլ բաց ու թափանցիկ է աշխատել, այսուհետ էլ նույնն է լինելու: Արդարադատության նախարարի պաշտոնակատարը նույնպես գոհ է նոր կարգից:
Դավիթ Հարությունյանին հարցրել են նաեւ Freedom House-ի հրապարակած զեկույցի մասին, որում իրավապաշտպան կազմակերպությունը Հայաստանը կիսակոնսոլիդացված ավտորիտար ռեժիմով երկիր է կոչել: Դրանում նշվում է նաեւ, որ Հայաստանի կառավարությունը չի ցանկանում արմատախիլ անել կոռուպցիան եւ չարաշահումները: Հարությունյանին դուր չի եկել, որ զեկույցում պիտակավորել են քաղաքական գործիչների:
Ինչ վերաբերում է ՀՀԿ-ի վարչապետի թեկնածուին: Էդուարդ Շարմազանովը երեկ հայտարարեց, որ քննարկվել է միայն Սերժ Սարգսյանի անունը: Դավիթ Հարությունյանն այսօր հակառակն է պնդել. վարչապետի թեկնածուներ ՀՀԿ-ում կան, պարզապես հաշվի առնելով առկա մարտահրավերները՝ ընտրել են Սերժ Սարգսյանին: Սակայն Հարությունյանը հստակ չի պատասխանել, թե, ամեն դեպքում, քանի թեկնածու են ունեցել եւ ովքեր են նրանք եղել:
Բեռնատարների վարորդներն այսօր բողոքի ակցիայի էին անում. նրանք տեւական ժամանակ փակել էին Երեւան-Գյումրի մայրուղու Ուջանի հատվածը՝ բողոքելով մեքենաները սահմանվածից ավելի բեռնելու համար կիրառվող խոշոր տուգանքների դեմ:
Ակցիայի մասնակիցները հայտարարել են, որ չեն բացելու մայրուղին, մինչեւ կառավարությունից որեւէ ներկայացուցիչ չհանդիպի իրենց հետ: Ի վերջո, Ուջան է մեկնել տրանսպորտի փոխնախարարի պաշտոնակատարը: Նա խոստացել է, որ կառավարությունն առայժմ տուգանք չի գանձվի, մինչեւ խնդիրը պարզաբանվի եւ լուծում ստանա: Վարորդները, ի վերջո, բացել են ճանապարհը, սակայն նշել, որ եթե խնդիրը չլուծվի, նորից են ակցիա անցկացնելու, այս անգամ՝ Բաղրամյան 26-ի դիմաց:
Երեւանում նույնպես այսօր ակցիա էր, այս դեպքում՝ Սերժ Սարգսյանի վարչապետության դեմ: Ցուցարարները վրան են խփել Մաշտոցի պողոտայում՝ Ֆրանսիական հրապարակի մոտ եւ հայտարարել, որ նստացույց են անելու: Կարճ ժամանակ անց ոստիկանները նրանց հեռացրել են ճանապարհի երթեւեկելի հատվածից, բայց ավելի քան կես ժամ Մաշտոցի պողոտան փակ է եղել: Ցուցարարներին ոստիկանության մեքենայով հեռացրել են ակցիայի վայրից, սակայն, ոստիկանության հայտարարության համաձայն, նրանց բերման չեն ենթարկել:
Միաժամանակ, այսօր Ազատության հրապարակում վաղը երեկոյան նախատեսված հանրահավաքի իրազեկման ավտոերթ է կազմակերպվել: Նրանք որոշել են ընդառաջ գնալ Նիկոլ Փաշինյանի նախաձեռնած քայլարշավի անդամներին:
Ադրբեջանի իշխող կուսակցությունը հայտարարել է նախագահական ընտրություններում Իլհամ Ալիեւի հաղթանակի մասին՝ չսպասելով քվեարկության պաշտոնական արդյունքներին: Արդյունքում, Ալիեւը երկրի ղեկավարի պաշտոնում կմնա եւս 7 տարի: Իսկ ԿԸՀ-ի տվյալներով՝ Ալիեւի օգտին քվեարկել է ընտրողների 86 տոկոսը: Ընդդիմությունը, սակայն, չի ճանաչում ընտրությունների արդյունքները: Պնդում են, որ քվեարկությունն անցկացվել է խախտումներով, արդյունքները չեն արտահայտում ժողովրդի կամքը եւ լեգիտիմ չեն:
Ընտրախախտումների մասին հայտարարել են նաեւ միջազգային դիտորդական կազմակերպությունները: Միաժամանակ, ԵԱՀԿ-ի ասուլիսի ժամանակ սկանդալ է առաջացել. իշխանամետ լրագրողներն ու կառավարության ներկայացուցիչները սկսել են բղավել եւ խանգարել խախտումների մասին խոսող դիտորդներին: Արդյունքում ասուլիսն ընդհատվել է, իսկ ԵԱՀԿ առաքելության անդամները լքել են դահլիճը:
ԱՄՆ-ն եւ Ռուսաստանը փորձում են հարաբերությունները պարզել, բայց այլ երկրի տարածքում: Վաշինգտոնն ու Մոսկվան միմյանց սպառնում են հրթիռակոծությամբ: Նախ Մոսկվան հայտարարեց, որ կխոցի Սիրիայի վրա արձակված ցանկացած հրթիռ, ինչին հետեւեց Վաշինգտոնի պատասխան սպառնալիքը. նախագահ Դոնալդ Թրամփը Twitter-ում գրեց. «Ռուսաստան, պատրաստվի՛ր. նրանք սլանում են»:
Նշենք, որ Սիրիայի հարցով հերթական իրարանցումը սկսվեց հրապարակումներից, թե սիրիական կառավարական զորքերը Դումայում քիմիական զենք են կիրառել խաղաղ բնակչության նկատմամբ, ինչից հետո էլ ԱՄՆ-ն Սիրիայի հրթիռակոծության պատրաստակամություն հայտնեց: Սպիտակ տան աշխատակազմից նշել են, որ առայժմ Թրամփն այդ հարցով վերջնական որոշում չի կայացրել: Չնայած Դամասկոսին ուղղված մեղադրանքներին՝ Սիրիային հարվածելու հարցում որոշում չունեն նաեւ եվրոպական երկրները: Մասնավորապես, Մեծ Բրիտանիան եւ Ֆրանսիան հայտարարել են, որ նման որոշում կկայացնեն քիմիական զենքի կիրառման մասին ծանրակշիռ ապացույցների առկայության դեպքում միայն:
Հայ ծանրորդները 2020 թվականի Օլիմպիադայի համար միայն 2 ուղեգրի հնարավորություն կունենան: Ծանրամարտի միջազգային ֆեդերացիայի նոր կանոնների համաձայն՝ 2008-2020 թվականներին բազմաթիվ դոփինգային խախտումներ ունեցած հինգ երկրների 2020 թվականի Օլիմպիական խաղերում կտրվի երկուական ուղեգիր նվաճելու հնարավորություն: Հայաստանից բացի՝ օլիմպիադային 2-ական ծանրորդ կուղարկեն նաեւ Ռուսաստանը, Ղազախստանը, Ադրբեջանն ու Բելառուսը: Իսկ եթե մինչեւ 2020 թվականի ապրիլ հակադոփինգային կանոնադրության նոր խախտումներ լինեն, այս երկրներն ընդհանրապես կզրկվեն օլիմպիական ուղեգրերից:
Ապրիլի 12-ին դոլարի արժեւորմանը միացել է նաեւ ռուբլին, իսկ եվրոն էժանացել է: Դոլարի փոխարժեքը կազմել է 483 դրամ, եվրոյինը՝ 596, ռուբլունը՝ 7 դրամ 81 լումա, ֆունտինը՝ 685 դրամ:
Ապրիլի 13-14-ին հանրապետությունում սպասվում է կարճատեւ անձրեւ եւ ամպրոպ: Օդի ջերմաստիճանը 14-15-ին 6-7 աստիճանով կնվազի: Երեւանում նույնպես վաղը հնարավոր են կարճատեւ տեղումներ: Մայրաքաղաքում գիշերը կդիտվի +9+11, ցերեկը՝ +24+26 աստիճան տաքություն: