Մեծ Բրիտանիայի ԱԳ նախարար Բորիս Ջոնսոնը Հյուսիսային եւ Հարավային Կորեաների միջեւ անցկացվող գագաթնաժողովը լավ նորություն է համարել, սակայն զգուշացրել է ավելորդ լավատեսությունից: Այս մասին ուրբաթ Բրյուսելում ՆԱՏՕ-ի երկրների ԱԳ նախարարների հանդիպման շրջանակում նա հայտարարել է լրագրողներին, փոխանցում է ՏԱՍՍ-ը:

«Ես անչափ ոգեւորված եմ տեղի ունեցածով: Չեմ կարծում, որ եթե որեւէ մեկը նայի միջուկային զենք մշակելու հյուսիսկորեական ծրագրերի պատմությանը, կարող է այս պահին չափից ավելի լավատեսորեն տրամադրվել, սակայն սա ակնհայտորեն լավ նորություն է»,- հայտարարել է Ջոնսոնը: Նրա հայտարարությունները հեռարձակվել են Sky News-ով:

Ավելի քան 10 տարում Հարավային եւ Հյուսիսային Կորեաների առաջնորդների միջեւ առաջին բանակցությունները սկսվել են ուրբաթ սահմանային Փհանմունջոմում: 1953 թվականից ի վեր Կիմ Չեն Ընը Հյուսիսային Կորեայի առաջին առաջնորդն է, որ այցելել է Հարավային Կորեայի տարածք:

• Տեղի է ունեցել Հարավային Կորեայի նախագահի եւ Հյուսիսային Կորեայի առաջնորդի բանակցությունների առաջին ռաունդը
• Մուն Չժե Ինը Կիմ Չեն Ընին առաջարկել է միավորել երկու երկրների երկաթուղիները