Մերձդնեստրից ռուս խաղաղապահների դուրսբերման մասին ՄԱԿ-ի Գլխավոր ասամբլեայի կողմից ընդունված բանաձեւը կարող է խաթարել Մերձդնեստրյան կարգավորման հարցում նկատվող առաջընթացը: Այս մասին ասվում է շաբաթ Ռուսաստանի Դաշնության արտաքին գործերի նախարարության հրապարակած մեկնաբանության մեջ:
ՊՆ-ն Մոլդովայի առաջարկած բանաձեւը անցանկալի եւ վտանգավոր է անվանել: «Մինչ օրս ռուսական ռազմական կոնտինգենտը Մերձդնեստրում խաղաղության եւ կայունության երաշխավորն է եղել: Բանաձեւի ընդունումը կարող է ձախողել Մերձդնեստրյան կարգավորման ճանապարհին վերջին ամիսներին նկատվող փխրուն առաջընթացը», - ասված է հաղորդագրության մեջ:
Ուրբաթ՝ հունիսի 22-ին, ՄԱԿ-ի Գլխավոր ասամբլեան պարզ մեծամասնությամբ ընդունել է բանաձեւի նախագիծ, որը կոչ է անում Մերձդնեստրից անհապաղ եւ ամբողջությամբ դուրս բերել խաղաղապահ ուժերի կազմում գտնվող ռուսական ռազմական ուժերին: Փաստաթղթի օգտին քվեարկել է 64 երկիր, դեմ է եղել15-ը, ձեռնպահ՝ 83-ը:
Բանաձեւի նախագիծը մշակվել էր Մոլդովայի կողմից` Վրաստանի, Կանադայի, Լատվիայի, Լիտվայի, Ռումինիայի, Ուկրաինայի եւ Էստոնիայի հետ համատեղ:
Բանաձեւի կողմնակիցների թվում էին ԵՄ երկրների մեծ մասը, ինչպես նաեւ ԱՄՆ-ն ու Կանադան: Աֆրիկյան եւ լատինաամերիկյան շատ երկրներ եւ մի շարք ԱՊՀ անդամներ ձեռնպահ են մնացել: Դեմ են քվեարկել այնպիսի երկրներ, ինչպիսիք են Հայաստանը, Բելառուսը, Կուբան, Իրանը, Նիկարագուան, Սիրիան եւ Վենեսուելան: