Քաղաքապետ Տարոն Մարգարյանն այսօր հրաժարական է ներկայացրել: ՀՀԿ-ական Մարգարյանը Երեւանի ավագանու կողմից քաղաքապետ էր ընտրվել 2017 թվականին: 40-ամյա քաղաքապետը Երեւանը, ընդհանուր առմամբ, ղեկավարեց 7 տարի: Այդ ամբողջ ընթացքում նա մշտապես հասարակության դժգոհության թիրախում էր, իսկ Նիկոլ Փաշինյանի կառավարության ձեւավորումից հետո քաղաքացիները նոր թափով սկսեցին պահանջել նրա հրաժարականը:
Ի դեպ՝ այսօր Տարոն Մարգարյանը հանդիպել է քաղաքապետարանի աշխատակազմի հետ ու տեղեկացրել իր հրաժարականի մասին, իսկ հետո Երեւանի ավագանու ՀՀԿ խմբակցության նիստ է հրավիրել եւ գործընկերներին շնորհակալություն հայտնել համատեղ աշխատանքի համար: Երեւանի նոր քաղաքապետին ավագանին կընտրի մեկամսյա ժամկետում: Թեկնածու կարող են առաջադրել ավագանու բոլոր խմբակցությունները:
Նիկոլ Փաշինյանի որդին այսօր մեկնեց ծառայության: Աշոտ Փաշինյանը, սեփական դիմումի համաձայն, ծառայելու է Արցախի զորամասերից մեկում: Լրագրողների հետ զրույցում նա հորդորեց չզարմանալ իր որոշման համար:
Կենտրոնական հավաքակայանում լրագրողների ամբողջ ուշադրությունը կարելի է ասել կենտրոնացած էր վարչապետի որդու ուղղությամբ. պաշտպանության նախարարին սա հունից հանեց: Դավիթ Տոնոյանն ասաց՝ առաջիկա օրերին իր որդին էլ է ծառայության մեկնելու, բայց, զգուշացրեց, լրագրողներն այդ մասին չեն իմանա. նա ծառայության կմեկնի առանց եռուզեռի, ինքն այդպիսի ուշադրություն թույլ չի տա: Դիտարկմանը, թե միշտ չէ, որ բարձրաստիճան պաշտոնյաների որդիներ են ծառայության մեկնում, նախարարն արձագանքեց:
Ավելի ուշ Կենտրոնական հավաքակայան այցելեց նաեւ Նիկոլ Փաշինյանը: Նա պաշտպանության նախարարի հետ շրջեց հավաքակայանում, ճաշեց որդու եւ մյուս նորակոչիկների հետ: Լրագրողների հետ զրույցում էլ վարչապետը վստահեցրեց, որ ի պաշտոնե պարզապես իրավունք չունի ավելի ուշադիր լինելու իր որդու նկատմամբ: Անդրադառնալով բանակում ծառայող իրենց որդիներին ոչինչ չուղարկելու մասին ծնողներին ուղղված իր կոչին՝ Փաշինյանը նշեց, որ շատերն այն ճիշտ չեն հասկացել:
Լրագրողները վարչապետից հետաքրքրվեցին նաեւ Ալեքսանդր Սարգսյանի գործից: Փաշինյանն ասաց՝ քաղաքացուց նամակ էր ստացել, որն էլ համապատասխան ընթացք է ստացել եւ Սարգսյանը բերման է ենթարկվել: Վարչապետն ընդգծեց, որ ինքն Ազգային անվտանգության ծառայության առաջ խնդիր է դրել՝ պետք է լինի օրինականություն, չի ասել՝ գնացեք խոշոր բացահայտում արեք: Վերջում արդեն Փաշինյանը հետեւեց վիճակահանության ընթացքին, զրուցեց որդու հետ եւ հեռացավ զինվորական հավաքակայանից:
Հայաստանի եւ Ադրբեջանի արտգործնախարարները հուլիսի 11-ին Բրյուսելում կհանդիպեն: ՀՀ ԱԳՆ-ն այս մասին տեղեկացրել է Twitter-ի իր պաշտոնական էջում: Պաշտոնում Զոհրաբ Մնացականյանի նշանակումից հետո սա նրա առաջին հանդիպում է Էլմար Մամեդյարովի հետ: Հուլիսի 11-13-ը Բրյուսելում կլինի նաեւ Նիկոլ Փաշինյանը: Վարչապետի գլխավորած կառավարական պատվիրակությունը կմասնակցի ՆԱՏՕ-ի գագաթնաժողովին: Փաշինյանը նաեւ վարչապետ ընտրվելուց հետո առաջին անգամ կհանդիպի Եվրամիության ղեկավարության հետ:
Երեւանում մեկնարկեց «Ոսկե ծիրան» միջազգային կինոփառատոնը: Այս տարի այն հոբելյանական է՝ անցկացվում է 15-րդ անգամ: Ի դեպ՝ փառատոնի բացման օրն այս տարի համընկավ Վարդավառի տոնի հետ: Հայաստան ժամանած աշխարհահռչակ ռեժիսոր Դարեն Արոնոֆսկուն Վարդավառը, կարծես, տպավորել է. ռեժիսորը որոշել էր «ջրոցի» խաղալ ե՛ւ լրագրողների, ե՛ւ փառատոնի բացմանը ներկաների հետ:
Արոնոֆսկին այս տարի «Ոսկե ծիրանի» հատուկ հյուրն է. փառատոնի ընթացքում նաեւ կցուցադրվեն նրա ֆիլմերից մի քանիսը: Նախորդ տարիներին հատուկ հյուրերի ցանկում հասցրել են լինել Օռնելա Մուտին, Կլաուդիա Կարդինալեն եւ Ֆաննի Արդանը: Իսկ 15-րդ կինոփառատոնին ներկա կլինեն նաեւ հայտնի այլ ռեժիսորներ՝ իտալացի Ջանֆրակո Ռոզին, ամերիկացի Շոն Բեյքերը, ավստրիացի Ուլրիխ Զայդլը:
Համաշխարհային ֆուտբոլի լեգենդար վետերանները Հայաստանում են: Երեկ Երեւանի «Հանրապետական» մարզադաշտում նրանք հանդիպում անցկացրեցին Եվրոպայի եւ Լատինական Ամերիկայի խորհրդանշական հավաքականների կազմում: Լեգենդների մասնակցությամբ խաղն ավարտվեց Լատինական Ամերիկայի հավաքականի հաղթանակով՝ 5:2 հաշվով: Եվրոպայի հավաքականից, որի դարպասապահը, ի դեպ, Հայաստանի ազգային հավաքականի երկարամյա դարպասապահ Ռոման Բերեզովսկին էր, գոլի հեղինակ դարձան Լուիշ Ֆիգուն եւ Յուրի Ջորկաեֆը: Իսկ Լատինական Ամերիկայի հավաքականից «եվրոպացիների» դարպասը գրավեցին Գաբրիել Բատիստուտան, Խավիեր Սավիոլան, Բեբետոն, դուբլի հեղինակ էլ դարձավ Դուեյն Դե Ռոսարիոն: Նշենք, որ հանդիպման երկրորդ խաղակեսին տրիբունայից հետեւում էր նաեւ վարչապետ Նիկոլ Փաշինյանը, որը խաղից հետո հանդերձարանում զրուցել է լեգենդար ֆուտբոլիստների հետ:
Ճապոնիայում հորդառատ անձրեւների եւ դրանց արդյունքում առաջացած սողանքների հետեւանքով զոհերի թիվը շարունակում է ավելանալ. վերջին տվյալներով՝ 120 մարդ է զոհվել: Մի քանի տասնյակ մարդ անհետ կորած է համարվում: Բնական աղետի հետեւանքով տուժածներին փրկելու եւ օգնություն ցուցաբերելու գործողություններին շտապօգնության եւ իրավապահ մարմինների ավելի քան 48 հազար աշխատակից է մասնակցում: Հուլիսի 5-ից տեղացող տեղատարափ անձրեւների հետեւանքով հարյուրավոր տներ են վնասվել, հազարավոր մարդիկ լքել են իրենց բնակավայրերը: Ճապոնական մի շարք պրեֆեկտուրաներում 400 միլիմետրից մինչեւ 1 մետր տեղումներ են գրանցվել, ինչը 2-3 անգամ գերազանցում է միջին ամսական ցուցանիշը:
Հուլիսի 9-ին դոլարը փոքր-ինչ էժանացել է, եվրոն՝ թանկացել: Դոլարի փոխարժեքը կազմել է 482 դրամ, եվրոյինը՝ 568, ռուբլունը՝ 7 դրամ 69 լումա, ֆունտինը՝ 643 դրամ:
Հուլիսի 10-12-ը հանրապետությունում սպասվում է առանց տեղումների եղանակ: Օդի ջերմաստիճանը 4-5 աստիճանով կբարձրանա: Ուլտրամանուշակագույն ճառագայթման ինդեքսը՝ 7: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +22+24, ցերեկը՝ +36+38 աստիճան տաքություն:
