«Ծառուկյան» խմբակցության պատգամավոր Վարդան Բոստանջյանը մանդատից հրաժարվելու դիմում է գրել։ Այն արդեն ուղարկվել է Ազգային ժողովի խոսնակին: Խմբակցության քարտուղար Վահե Էնֆիաջյանը տեղեկացրել է, որ Բոստանջյանը մանդատից հրաժարվել է առողջական խնդիրների պատճառով:
Նա լրատվամիջոցներին հորդորել է հրաժարականի դրդապատճառների մասին ասեկոսեներ չտարածել՝ պնդելով, որ պատճառը երկարատեւ բուժման անհրաժեշտությունն է: Միաժամանակ, լուրեր են պտտվում, որ Վարդան Բոստանջյանը ստիպված է եղել հրաժարական տալ Ռոբերտ Քոչարյանի կալանավորման եւ նրան առաջադրված մեղադրանքի մասին հրապարակային կարծիք հայտնելու համար, այն դեպքում, երբ Գագիկ Ծառուկյանի գլխավորած քաղաքական ուժը դեռեւս պաշտոնապես դիրքորոշում չի հայտնել այդ կապակցությամբ:
Հանրապետական կուսակցությունը ստորագրահավաք է սկսել՝ Ռոբերտ Քոչարյանի նկատմամբ որպես խափանման միջոց ընտրված կալանքը փոխելու պահանջով: ՀՀԿ փոխնախագահ Արմեն Աշոտյանն ասում է՝ դա բխում է թե՛ կուսակցության, թե՛ խմբակցության կողմից գործի առնչությամբ արված հայտարարություններից: Աշոտյանն այլ մանրամասներ չի հայտնել, նշել է միայն, որ ստորագրությունները հետագայում որպես պատգամավորների անձնական երաշխավորություն ներկայացվելու են դատարանում՝ Հայաստանի երկրորդ նախագահի խափանման միջոցը փոխելու համար:
Մինչ այդ, Քոչարյանի փաստաբանները նրա կալանավորման դեմ Վերաքննիչ բողոքը կներկայացնեն վաղը՝ օգոստոսի 1-ին, թեեւ ավելի վաղ հայտնել էին, որ բողոքն այսօր են ներկայացնելու: Արամ Օրբելյանի խոսքով՝ պատճառները տեխնիկական են: Հավելենք, որ Մարտի 1-ի գործով Հայաստանում սահմանադրական կարգը տապալելու մեջ մեղադրվող երկրորդ նախագահը 2 ամսով կալանավորվել է: Պաշտպանը հայտնել է նաեւ, որ Ռոբերտ Քոչարյանն առանձին խցում է պահվում:
Վարչապետ Նիկոլ Փաշինյանի սեպտեմբերին ԱՄՆ կմեկնի. նա Նյու Յորքում կմասնակցի ՄԱԿ-ի Գլխավոր վեհաժողովի աշխատանքների բացմանը: ԱԳ նախարարության խոսնակը հաստատել է լուրը՝ հավելելով, որ արդեն Փաշինյանի երկկողմ հանդիպումներն են նախապատրաստում: Մտադիր են նաեւ Նիկոլ Փաշինյան-Դոնալդ Թրամփ հանդիպում կազմակերպել: Իսկ ահա Հայաստանի եւ Ադրբեջանի նախագահների հանդիպման առնչությամբ դեռեւս հստակություն չկա: Նիկոլ Փաշինյանն արդեն Ալիեւի հետ հանդիպման պատրաստակամություն է հայտնել, սակայն, Տիգրան Բալայանի խոսքով, հանդիպումը չի կարող ինքնանպատակ լինել:
Ինչ վերաբերում է ՀԱՊԿ գլխավոր քարտուղար Յուրի Խաչատուրովին. Տիգրան Բալայանը վերահաստատել է, որ Հայաստանը նրան փոխարինելու գործընթաց է նախաձեռնել, բայց դա չի նշանակում, որ Յուրի Խաչատուրովն այլեւս չի զբաղեցնում այդ պաշտոնը: Տիգրան Բալայանը, միաժամանակ, դժվարացել է նշել, թե ո՞վ կփոխարինի նրան այդ պաշտոնում: Հիշեցնենք, որ Յուրի Խաչատուրովին Մարտի 1-ի գործով մեղադրանք է առաջադրվել Հայաստանում սահմանադրական կարգը տապալելու համար. 2008 թվականին նա Զինված ուժերի Երեւանի կայազորի պետն էր: Խաչատուրովը 5 մլն դրամ գրավի դիմաց ազատ է արձակվել:
Երեւանի Հաղթանակ թաղամասում ավելի քան մեկ շաբաթ առաջ բռնկված հրդեհը դեռեւս չի հաջողվում մարել: Աղբանոցում բռնկված հրդեհը մարելու աշխատանքին մասնակցում են «Սանիթեք»-ի 3 ջրատար, ԱԻՆ հրշեջ-փրկարարական ջոկատից 4 մարտական հաշվարկ եւ մեկ տրակտոր: Հրդեհն աղբանոցում սկսվել է հուլիսի 24-ին: Կրակը շուրջ 4.000 խ.մ. տարածք է ընդգրկել:
Հուլիսի 31-ին դոլարը, եվրոն եւ ռուբլին թանկացել են: Դոլարի փոխարժեքը կազմել է 480 դրամ, եվրոյինը՝ 563, ռուբլունը՝ 7 դրամ 71 լումա, ֆունտինը՝ 632 դրամ:
Օգոստոսի 1-ին հանրապետության հյուսիսային շրջաններում գիշերը եւ երեկոյան ժամերին սպասվում է անձրեւ եւ ամպրոպ: Օդի ջերմաստիճանը 1-4 աստիճանով կնվազի: Երեւանում նույնպես երեկոյան ժամերին հնարավոր են տեղումներ: Մայրաքաղաքում գիշերը կդիտվի +23+25, ցերեկը՝ +38+40 աստիճան տաքություն: