Ապօրինի սահմանահատման երկրորդ դեպքը մեկ շաբաթվա ընթացքում: Հայ-թուրքական սահմանին, այս անգամ՝ Արտաշատի ուղղությամբ, Հայաստանում ծառայություն իրականացնող ռուս սահմանապահները սահմանախախտի են բռնել: Նա ապօրինի հատել է Արաքս գետով անցնող սահմանը: Սահմանախախտը Բանգլադեշի քաղաքացի է, նրան Հայաստանի իրավապահ մարմիններին են փոխանցել: Անցյալ շաբաթ էլ հայ-թուրքական սահմանի Գյումրիի հատվածում թուրք հետախույզ էր բռնվել: Թուրքիայի քաղաքացու մոտ բջջային հեռախոս էին գտել՝ պետական սահմանին տեղակայված ինժեներական կառույցների եւ պատնեշների լուսանկարներով ու ֆայլերով:
Հանրապետական կուսակցությունը հրապարակել է այն պատգամավորների անունները, որոնք ստորագրել են Ռոբերտ Քոչարյանի խափանման միջոցը փոխելու միջնորդության երաշխավորագիրը: Ցանկում 43 պատգամավորի անուն կա: Կուսակցությունում շեշտել են, որ ցանկը գաղտնի չէ, նաեւ հավելել, որ յուրաքանչյուր պատգամավոր ինքն է որոշում՝ երբ հրապարակայնացնել այս կամ այն հասարակական նշանակություն ունեցող փաստաթղթի տակ ստորագրելու փաստը:
Նշենք, որ պատգամավորների երաշխավորագիրն արդեն գլխավոր դատախազությունն է ուղարկվել: Միաժամանակ, գլխավոր դատախազ Արթուր Դավթյանին Ռոբերտ Քոչարյանի խափանման միջոցը փոխելու միջնորդություն-խնդրանք են ներկայացրել նաեւ Արցախի մի խումբ պատգամավորներ: Այն 15 պատգամավոր է ստորագրել:
Գագիկ Ծառուկյանը չի ընդունել Գեւորգ Պետրոսյանի՝ պատգամավորական մանդատից հրաժարվելու դիմումը: «Ծառուկյան» խմբակցության ղեկավարն ասում է՝ վստահ է, որ Պետրոսյանը չի կարող ծախված լինել կամ պատվեր կատարել: Պատգամավորը մանդատից հրաժարվելու դիմում էր ներկայացրել Նաիրա Զոհրաբյանին քննադատելուց հետո։ Նա ֆեյսբուքյան գրառմամբ դժգոհել էր Զոհրաբյանին Երեւանի քաղաքապետի թեկնածու առաջադրելու կապակցությամբ: Այս գրառումից հետո լուրեր տարածվեցին, որ Գեւորգ Պետրոսյանն ական է խմբակցությունում եւ համագործակցելու է այլ քաղաքական ուժերի հետ, ինչից հետո էլ նա մանդատից հրաժարվելու դիմում ներկայացրեց խմբակցության ղեկավարին:
Նաիրիտցիների աշխատավարձի խնդիրը, կարծես, լուծում է ստանում: Առաջին փոխվարչապետ Արարատ Միրզոյանը տեղեկացրել է, որ «Նաիրիտի» տեխնիկական անվտանգության ծառայության 116 աշխատակիցներին արդեն 5 ամսվա աշխատավարձի պարտք է վճարվել, ընդհանուր առմամբ՝ 55 մլն դրամ: Հաշվարկվում են նաեւ ուշացման համար վճարվելիք տոկոսագումարները։ «Նաիրիտի» 116 աշխատակիցներ աշխատավարձ չէին ստացել 2018 թվականի հունվարից, եւ պարբերաբար բողոքի ակցիաներ էին իրականացնում կառավարության շենքի դիմաց:
Հայաստանը չի կարող հավակնել ամերիկյան «Հազարամյակի մարտահրավերներ» կորպորացիայի դրամաշնորհներին: Բանն այն է, որ Համաշխարհային բանկի 2018 թվականի հուլիսի 1-ի զեկույցի համաձայն՝ Հայաստանը «բարձր-միջին» եկամուտ ունեցող երկիր է դարձել, իսկ կորպորացիան աջակցություն է տրամադրում «ցածր» եւ «ցածր-միջին» եկամուտ ունեցող երկրներին: Մինչեւ 2008 թվականը «Հազարամյակի մարտահրավերներ» կորպորացիան մեր երկրում տասնյակ միլիոնավոր դոլարների ծրագրեր է իրականացրել: «Թավշյա հեղափոխությունից» հետո ԱՄՆ Կոնգրեսի եւ Ամերիկայի հայ համայնքի անդամները դիմել էին կորպորացիային՝ կոչ անելով վերականգնել Հայաստանին տրամադրվող օգնությունը:
Այնթափ գյուղում տեղի ունեցած սպանության գործով ձերբակալված կա: 28-ամյա Արթուր Սահակյանի դին օգոստոսի 6-ին վաղ առավոտյան հայտնաբերել էին «Վարդա» գիշերային ակումբի մոտ՝ բռնության հետքերով, որովայնի շրջանում կտրած-ծակած վնասվածքով։ Պարզվել է, որ նա կյանքի հետ անհամատեղելի մարմնական վնասվածքները ստացել է վիճաբանության ժամանակ:
Ձերբակալվածը գիշերային ակումբի տնօրենն է: Վիճաբանության ընթացքում նա նույնպես դանակահարվել ու հիվանդանոց էր տեղափոխվել: Գործով նախաքննությունը շարունակվում է:
Օգոստոսի 7-ին դոլարը, եվրոն եւ ռուբլին թանկացել են: Դոլարի փոխարժեքը կազմել է 481 դրամ, եվրոյինը՝ 558, ռուբլունը՝ 7 դրամ 59 լումա, ֆունտինը՝ 624 դրամ:
Օգոստոսի 8-ի գիշերը եւ երեկոյան ժամերին հանրապետության հյուսիսային շրջաններում սպասվում է անձրեւ եւ ամպրոպ, առանձին հատվածներում՝ կարկուտ: Օդի ջերմաստիճանը 2-3 աստիճանով կնվազի: Երեւանում նույնպես հնարավոր են տեղումներ: Մայրաքաղաքում գիշերը կդիտվի +21+23, ցերեկը՝ +34+36 աստիճան տաքություն: