Թուրքիան քննադատել է Չինաստանի վերաբերմունքը երկրի արմատական մահմեդական թյուրքական ազգաբնակչության՝ ույղուրների նկատմամբ՝ անվանելով այն «մարդկության մեծագույն ամոթը», հաղորդում է The Guardian-ը:
«Չինաստանի իշխանությունների համակարգային ասիմիլյացիոն քաղաքականությունը թյուրքական ույղուրների նկատմամբ մարդկության մեծագույն ամոթն է»,-նշվում է Թուրքիայի ԱԳՆ-ի մամուլի քարտուղար Համի Աքսոյի հայտարարության մեջ:
Աքսոյը նաեւ հայտարարել է, որ Թուրքիան տեղեկացել էր ույղուր բանաստեղծ եւ երաժիշտ Աբդուրեհիմ Հեյիթի՝ բանտում «ողբերգական» մահվան մասին:
«Մեծ ցավով տեղեկացանք, որ հարգարժան բանաստեղծ Աբդուրեհիմ Հեյիթը, որը դատապարտվել էր 8 տարվա ազատազրկման, մահացել է բանտարկության երկրորդ տարում»,-նշվում է հայտարարության մեջ:
«Այդ ողբերգությունը ամրապնդել է Թուրքիայի հասարակության դիրքորոշումը Սինցզյանի շրջանում մարդու իրավունքների լրջագույն խախտումների վերաբերյալ»,-ասվում է փաստաթղթում:
Այդ առնչությամբ Թուրքիան դիմել էր ՄԱԿ-ին՝ կոչ անելով «արդյունավետ քայլեր ձեռնարկել Սինցզյան շրջանում մարդկային ողբերգությանը վերջ տալու համար»:
Սինցսյանը ինքնավար մարզ է Չինաստանում , որը հիմնականում բնակեցված է թյուրքական ույղուրներով:
Որոշ երկրներ մեղադրում են Չինաստանին այդ ժողովրդի ներկայացուցիչների նկատմամբ ասիմիլյացիոն քաղաքականություն վարելու մեջ:
Համաձայն ՄԱԿ-ի փորձագետների զեկույցի՝ Չինաստանում բացված «պրոֆեսիոնալ-տեխնիկական կրթության կենտրոններում» կան շուրջ մեկ միլիոն ույղուրներ եւ թյուրքական ազգային փոքրամասնությունների այլ ներկայացուցիչներ:
Պեկինն, իր հերթին, հայտարարում է, որ տվյալ կենտրոնները նպաստում են, որ մարդիկ հեռու մնան ահաբեկչությունից եւ վերաինտեգրվեն հասարակության մեջ:
