Նոր տեսակի կորոնավիրուսի համավարակի տարածմամբ պայմանավորված ՀՀ վերաքննիչ քաղաքացիական դատարանը մարտի 16-ից 23-ը ընկած ժամանակահատվածում նշանակված դատական նիստերը կիրականացնի գրավոր ընթացակարգով։ Այս մասին NEWS.am–ին հայտնեց Վերաքննիչ քաղաքացիական դատարանի նախագահ Արսեն Մկրտչյանը։

Վերջինս տեղեկացրեց, որ անձնային շփումները հնարավորինս բացառելու համար գործին մասնակցող անձանց հորդորել են խուսափել փաստաթղթերը առձեռն դատարանի գրասենյակ հանձնելուց և դրանք ուղարկել փոստով, իսկ գործին մասնակցող անձանց խնդրել են գործի նյութերին ծանոթանալու, դրանց պատճենները ստանալու, գործի նյութերից քաղվածքներ, լուսանկարներ, լուսապատճեններ և պատճեններ անելու համար դատարանի գրասենյակ ներկայանալ միայն խիստ անհրաժեշտության դեպքում։

Արսեն Մկրտչյանը նշեց, որ համալիր միջոցառումներ են իրականացնում ինչպես դատարանի տարածքը, այնպես էլ դատական նիստերի դահլիճները ախտահանելու համար։ Նրա խոսքով՝ դատարանի աշխատակազմն ապահովված է անհրաժեշտ ձեռնոցներով, դիմակներով։

Նշենք, որ ավելի վաղ հայտարարությամբ էր հանդես եկել Բարձրագույն դատական խորհուրդը՝ առաջարկելով բոլոր դատարաններին և դատավորներին իրենց գործառույթները հնարավորինս իրականացնել օրենքով սահմանված գրավոր ընթացակարգերով։

Բացի այդ, հանձնարարվել է դատարանների նախագահներին, դատական դեպարտամենտին և դատական կարգադրիչների ծառայությանը ապահովել աշխատակիցների որոշ մասի աշխատանքը հեռահար եղանակով իրականացնելու հնարավորությունը։ Նշենք, սակայն, որ դատական նիստերը հետաձգելու որոշում դեռևս չի կայացվել։