Մարտի 23-ին Ազգային ժողովը ՀՀ Կառավարության նախաձեռնությամբ արտահերթ նիստ է գումարել, որի ընթացքում երկրորդ ընթերցմամբ քննարկվում է Վարչական իրավախախտումների մասին օրենսգրքում եւ Քրեական օրենսգրքում փոփոխություններ կատարելու մասին օրենսդրական փաթեթը, որոնց համաձայն առաջարկվում է տուգանել եւ քրեական պատասխանատվության երնթարկե քաղաքացիներին Կառավարության կողմից հայտարարված արտակարգ դրություն ընթացքում խախտումների համար: Օրենսդրական նախաձեռնությունը ներկայացրել է ՀՀ արդարադատության նախարար Ռուստամ Բադասյանը: Առաջին ընթերցման ընթացքում, որը տեղի էր ունեցել մարտի 20-ի երեկոյան, 102 խորհրդարանական միաձայն աջակցել էին այս օրենսդրական նախաձեռնությանը:
Կառավարության առաջարկած օրենսդրական նախաձեռնության էությունը զանգվածային լրատվության տարածման գործընթացում ներգրավված անձանց եւ կազմակերպությունների գործունեության ժամանակավոր կարգավորման ապահովումն է: Մասնավորապես, կառավարության կողմից արտակարգ դրության ժամանակահատվածում հաստատված պահանջների խախտման համար լրատվամիջոցները կտուգանվեն նվազագույն աշխատավարձի 100-ից 300-ապատիկի չափով: Ընդ որում, եթե կատարված խախտումները հնարավորինս շուտ չվերացվեն, ապա լրատվամիջոցների նկատմամբ կրկնակի տուգանք կկիրառվի` նվազագույն աշխատավարձի 500-ից 1000-ապատիկի չափով: Բացի այդ, մեկուսացման կամ ինքնամեկուսացման ռեժիմի պահանջների խախտման համար քաղաքացուն սպառնում է տուգանք` նվազագույն աշխատավարձի 100-ից 250-ապատիկի չափով: Իսկ եթե վարակված քաղաքացին միտումնավոր կերպով վարակել է մեկ այլ քաղաքացու կյանքի համար վտանգավոր վարակով, ապա նրա նկատմամբ տուգանք կկիրառվի նվազագույն աշխատավարձի 400-ից 800-ապատիկի չափով կամ կալանք` մինչեւ 1 ամիս ժամկետով, կամ ազատազրկում` մինչեւ 1 տարի ժամկետով: Ընդ որում, եթե այս հանցագործությունը կատարվել է երկու կամ ավելի անձանց, անչափահասների կամ հղի կնոջ նկատմամբ, ապա քաղաքացին կտուգանվի նվազագույն աշխատավարձի է 800-ից 1000-ապատիկի չափով կամ կալանքով` 1-ից 3 ամիս ժամկետով, կամ ազատազրկմամբ՝ 1-ից 3 տարի ժամկետով: Եթե տվյալ գործողություններն անփութության հետեւանքով հանգեցրել են մարդու մահվան, ապա դրա համար մեղավոր վարակված քաղաքացին բանտ կուղարկվի` 3-ից 5 տարի ժամկետով:
