Բուլղարիան նախատեսում է մեկ ամսով երկարաձգել արտակարգ դրության ռեժիմը` կորոնավիրուսի տարածումը կանգնեցնելու համար, հայտնել է երկրի կառավարությունը: Հաղորդվում է, որ Բուլղարիայում կորոնավիրուսով վարակման հաստատված դեպքերի թիվը 422 է, փոխանցում է Reuters-ը:
Ավելի վաղ խորհրդարանը միաձայն կողմ էր քվեարկել ապրիլի 13-ին արտակարգ դրության սահմանմանը: Երկրի կառավարությունը հայտարարել էր, որ խորհրդարանին կխնդրի երկարաձգել այն մինչեւ մայիսի 13-ը:
«Բուլղարիան անում է հնարավոր ամեն ինչ` նոր կորոնավիրուսների տարածումը սահմանափակելու համար, բայց ճգնաժամի աստիճանը դեռ լիարժեք կերպով չի կարող գնահատվել,- հայտարարել են կառավարությունում:- Ճնշումն առողջապահական համակարգի վրա կարող է կրճատվել միայն սոցիալական հեռավորության պահպանման ուղղված միջոցառումների ընդլայնման ճանապարհով»:
Ինչպես եւ եվրոպական այլ երկրներ, Բուլղարիան եւս խիստ սահմանափակումներ է մտցրել քաղաքների միջեւ եւ դեպի արտերկիր ուղեւորությունների համար, դպրոցները, ռեստորանները եւ բարերը փակ են, զբոսայգիների մուտքը սահմանափակ է:
Չորեքշաբթի օրվա դրությամբ, Բուլղարիայում այս հիվանդությունից ինը մահվան դեպք է հաստատվել:
Խորհրդարանի խոսնակ Ցվետա Կարայանչեւան արտակարգ ճեպազրույցի ժամանակ ասել է, որ բոլոր օրենսդիրները թեստեր են հանձնում այն բանից հետո, երբ երեքշաբթի պատգամավորներից մեկի մոտ կորոնավիրուս էր հայտնաբերվել: