Ավստրիայում COVID-19-ի դեմ պարտադիր պատվաստումների ներդրման մասին օրենքի նախագիծը նախատեսում է մինչեւ 7200 եվրո տուգանք՝ պատվաստումից հրաժարվելու համար։ Այս մասին, հայտնել է Die Presse թերթը՝ հղում անելով ավստրիական կառավարության կողմից մշակվող փաստաթղթին։

Փաստաթղթի նախագծի համաձայն՝ 2022 թվականի փետրվարից կորոնավիրուսի պարտադիր պատվաստումը կտարածվի Ավստրիայում բոլոր բնակվողների վրա։ Պատվաստվելուց հրաժարվելու համար կսահմանվի 3600 եվրո տուգանք կամ չորս ամսվա ազատազրկում։ 7200 եվրոյի չափով խոշոր տուգանք կսպառնա նրանց, ովքեր կանտեսեն պատվաստումների անհրաժեշտության մասին իշխանությունների երկու ծանուցումները, հայտնում է ՏԱՍՍ-ը։

Բացառությունները կներառեն այն մարդկանց, ում կյանքի եւ առողջության համար պատվաստումների պատճառով ռիսկ կա, հղի կանանց եւ մինչեւ 12 տարեկան դեռահասներին: Օրինագիծը ներկայացվելու է դեկտեմբերի 6-ով սկսվող շաբաթվա ընթացքում: Այն դեռ պետք է հաստատվի Ավստրիայի խորհրդարանի երկու պալատների կողմից։

Համավարակի չորրորդ ալիքի պատճառով Ավստրիայի կառավարությունը հայտարարել է 2022 թվականի փետրվարից COVID-19-ի դեմ պարտադիր պատվաստում մտցնելու ծրագրի մասին։ Այս միջոցը ավստրիական հասարակության կողմից չի ընդունվում եւ տասնյակ հազարավոր մարդկանց մասնակցությամբ զանգվածային բողոքի ցույցերի պատճառ է դարձել: