Եթե ​​երկրորդ բանակային կորպուսի հրամանատարն ազատվել է պաշտոնից, ապա այս տրամաբանությամբ Փաշինյանը նույնպես պետք է հեռացվի գերագույն գլխավոր հրամանատարի պաշտոնից։ Այս մասին հունվարի 19-ին NEWS.am-ի թղթակցի հետ զրույցում ասաց Հայաստանի զինված ուժերի գլխավոր շտաբի նախկին պետ, գեներալ-լեյտենանտ Նորատ Տեր-Գրիգորյանցը։

«Սա սխալ  եւ ոչ նորմալ երեւույթ է: Կադրերի հետ այդպես չեն վարվում: Գիտեք որքա՞ն է պետք անցնել կորպուսի հրամանատար դառնալու համար։ Դասակ, վաշտ, գումարտակ, դիվիզիա։

Այո, արտակարգ դեպք է տեղի ունեցել, բայց ինչո՞ւ պետք է կորպուսի հրամանատարին հեռացնեն։ Հայաստանում այսօր դա արվում է հենց այնպես։ Նոյեմբերյանի ուղղությամբ մի լավ զինվորական գեներալ Սարգսյան կար, իսկ  նրան պատերազմից  առաջ ազատեցին պաշտոնից։ Մի՞թե կարելի է այդպես անել։

Չէ որ այդպիսով խաթարվում է մարտունակությունը, ոչնչացվում է գեներալի հեղինակությունը, իսկ սա գրեթե պարտություն է։ Չի կարելի այդպես կադրերը ցրիվ տալ: Գեներալները պետք է հեղինակություն լինեն։ Պատասխանատվությունը պետք է կրեն անմիջականորեն այդ զորամասի պետը, թիկունքի պետը, գումարտակի, վաշտի հրամանատարը»,- նշեց գեներալը։

Նա  խորին ցավակցություն հայտնեց զոհված զինծառայողների ընտանիքներին եւ հարազատներին։

Հիշեցնենք, որ հունվարի 19-ին՝ ժամը 01:30-ի սահմաններում, հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Հրդեհի հետեւանքով զոհվել է 15, վիրավորվել՝ 3 զինծառայող։

Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը եւ եւս 7 բարձրաստիճան զինվորական։

 Արամ Դանիելյան