նախընտրելի դարձնել
Այսօր տեղի է ունեցել Հայաստանի Վերահսկիչ պալատի խորհրդի ընդլայնված նիստ:
ՀՀ ՎՊ լրատվական ծառայությունից հայտնում են, որ նիստի սկզբում ՎՊ նախագահ Իշխան Զաքարյանը հրապարակել է ՀՀ Նախագահ Սերժ Սարգսյանի հրամանագրերը` ՎՊ աշխատակիցներին շնորհակալագրերով պարգեւատրելու մասին:
Խորհրդակցության ընթացքում քննարկվել է նաեւ Վերահսկիչ պալատի 2013 թվականի գործունեության ծրագրին առնչվող հարցեր: Համաձայն «ՀՀ Վերահսկիչ պալատի մասին» ՀՀ օրենքի` Վերահսկիչ պալատի գործունեության տարեկան ծրագրի նախագիծն Ազգային ժողովի քննարկմանն է ներկայացվում բյուջետային տարին սկսվելուց առնվազն 60 օր առաջ`մինչեւ նոյեմբերի 1-ը:
Նշենք, որ 2011 թվականի գործունեության տարեկան ծրագրի մասին հավետվությունում ՎՊ-ն արձանագրել էր պետական գնումների կազմակերպման, շինարարական աշխատանքների իրականացման խախտումներ ու չարաշահումներ: Մասնավորապես, նախագծանախահաշվային փաստաթղթերում եղել են ծավալային հավելագրումներ, գների արհեստական թանկացումներ, բազմաթիվ ու բազմաբնույթ չարաշահումներն ու թերություններ են բացահայտվել սոցիալական ծառայություններում, արտադրության եւ սպառման, վտանգավոր թափոնների, ընդերքի տրամադրման եւ օգտագործման ոլորտներում: Այս ամենը հաշվի առնելով` Վերահսկիչ պալատը եկող տարի շարունակելու է ուշադրության կենտրոնում պահել պետական բյուջեի առավել ռիսկային ուղղությունների օպերատիվ հսկողությունը:
