նախընտրելի դարձնելՀայաստանի փոխվարչապետ, տարածքային կառավարման նախարար Արմեն Գեւորգյանի մոտ մարզպետների մասնակցությամբ այսօր կայացած խորհրդակցության ընթացքում քննարկվել են սեպտեմբերի 15-ին ՀՀ կառավարությունում ՀՀ նախագահի կողմից անցկացված խորհրդակցության ժամանակ բարձրացված գնումների գործընթացներում հայտնաբերված խնդիրներին վերաբերող հարցեր: Այս մասին NEWS.am-ին հայտնեցին ՏԿՆ հասարակայնության հետ կապերի բաժնից:
Ա. Գեւորգյանը մարզպետներին հանձնարարել է լրջորեն հետեւել մարզպետարանի ենթակայության տակ գտնվող հիմնարկներում պետական գնումների ընթացակարգերին, ուշադրության կենտրոնում պահել բյուջետային գումարների արդյունավետ տնօրինման հարցերը, մասնավորապես` հետեւողական լինել մարզային առողջապահական հաստատություններում պետական գնումների գործընթացների` օրենքով սահմանված կարգով կազմակերպմանը:
Մարզպետների հետ քննարկվել են 2013 թ. հունվարի 1-ից սոցիալական վճարների եւ եկամտահարկի մասով փոփոխությունների եւ նվազագույն աշխատավարձի բարձրացման արդյունքում համայնքներում լրացուցիչ ֆինանսական ծախսերին վերաբերող հարցեր: Ա.Գեւորգյանը հանձնարարել է հաշվարկել ֆինանսական այդ պարտավորությունից առաջացող գումարների չափը` նշելով նաեւ դրանք վճարելու համար հնարավոր ֆինանսական աղբյուրները:
Խորհրդակցության օրակարգում էին մարզերի առաջնահերթ խնդիրների լուծման ծրագրի ընթացքին եւ չորրորդ փուլի նախապատրաստմանը վերաբերող հարցեր: Տեղեկություններ են ներկայացվել մարզերում դիզվառելիքի եւ պարարտանյութի բաշխման եւ գումարների հավաքագրման ընթացքի վերաբերյալ, քննարկվել եբ աշխատանքների արդյունավետ կազմակերպմանն առնչվող հարցեր:
Օրակարգում էին նաեւ առաջիկայում նախատեսվող միջոցառումների կազմակերպչական հարցերը, մասնավորապես` հոկտեմբերի 5-6-ը Ջերմուկում Գյուղական համայնքների երկրորդ համաժողովը, հոկտեմբերի 12-13-ին կայանալիք հայ-ռուսական միջտարածաշրջանային համագործակցության երկրորդ համաժողովը: Անդրադարձել են նաեւ Տնտեսական մրցակցության պաշտպանության պետական հանձնաժողովի կողմից մանկապարտեզներում իրականացված ուսումնասիրությունների արդյունքներին: Փոխվարչապետը մարզպետներին հանձնարարել է ուսումնասիրել արձանագրված խնդիրները եւ միջոցներ ձեռնարկել սեղմ ժամկետներում դրանք վերացման ուղղությամբ:
