Վարչապետ Տիգրան Սարգսյանը Երեւանի Կարեն Դեմիրճյանի անվան մարզահամերգային համալիրում մասնակցել է ԱՊՀ անդամ-պետությունների կրթության ոլորտի աշխատողների եւ ուսուցիչների երկրորդ համագումարի բացմանը:

ՀՀ կառավարության անունից ողջունելով համագումարի մասնակիցներին՝ Տիգրան Սարգսյանը կարեւորել է կրթական համակարգի զարգացմանն ուղղված աշխատանքները: «Ժամանակից պետությունը եւ  հասարակությունը չի կարող կառուցվել առանց արդյունավետ կրթական համակարգի: Ժամանակից աշխարհում փոխվում է հասարակության զարգացման տրամաբանությունը: Այսօր հասարակության զարգացման հիմնական միջոցը ոչ թե ապրանքների արտադրությունն ու արդյունաբերությունն է, այլ նոր գիտելիքների արտադրությունը: Սա պահանջում է երկրների կառավարություններից, որպեսզի նրանք դրան համապատասխան փոխեն պետության կառավարման համակարգի ողջ գործընթացը»,- ասել է վարչապետը:   

Կառավարության ղեկավարի խոսքով՝ ժամանակակից պետության հիմնական գործառույթներն են՝ կրթությունը եւ գիտությունը: «Այսօր հասարակության հիմնական գործընթացը դառնում է մտագործունեությունը: Դա նշանակում է, որ պետությունը պարտավոր է ստեղծել այնպիսի ենթակառուցվածքներ, որպեսզի մարդը կարողանա ինքնադրսեւորվել իր տաղանդի եւ գիտելիքների հիման վրա»,- ասել է Տիգրան Սարգսյանը:   

Այս համատեքստում, վարչապետի դիտարկմամբ, առաջնային նշանակություն ունեն համալսարանները: Կառավարության ղեկավարը նշել է, որ այսօր համալսարանների շրջանակներում ստեղծվում են ժամանակակից տեխնոլոգիական կենտրոններ, այսինքն՝ այնպիսի ենթակառուցվածքներ, որոնք ստեղծագործող մարդու համար ապահովում են մտագործունեության բոլոր հնարավորությունները: «Մեր պարտքն է  ստեղծել այնպիսի կրթական համակարգ, որպեսզի մարդն իր ողջ կյանքի ընթացքում հնարավորություն ունենա նոր մակարդակի բարձրացնել եւ համալրել իր գիտելիքները»,- ասել է Տիգրան Սարգսյանը: Այդ առումով, կառավարության ղեկավարը կարեւորել է նաեւ ԱՊՀ շրջանակում կրթության եւ գիտության ոլորտում ինտեգրացիոն գործընթացները եւ նշել, որ Հայաստանը շահագրգռված է դրանում:

Համագումարին մասնակցում են Հայաստանի, Ռուսաստանի, Ուկրաինայի, Բելառուսի, Տաջիկստանի, Ղազախստանի, Ղրղզստանի, Թուրքմենստանի եւ Մոլդովայի ներկայացուցիչները: Համագումարի նպատակն է առաջիկա տարիներին կրթության եւ գիտության ազգային համակարգերի հետագա համագործակցության գերակա ուղղությունների մշակումը, ԱՊՀ պետությունների համագործակցությունն ավելի դինամիկ եւ պահանջված դարձնելը: