նախընտրելի դարձնելՀայաստանում քաղաքական գործընթացները կարող են ընթանալ միայն Սահմանադրությանը համապատասխան:
Այդ մասին այսօր` փետրվարի 26-ին, խորհրդարանում լրագրողների հետ զրույցում հայտնել է խորհրդարանի փոխխոսնակ, իշխող Հայաստանի հանրապետական կուսակցության մամուլի քարտուղար Էդուարդ Շարմազանովը` պատասխանելով հարցին, թե ինչպիսի ներքաղաքական զարգացումներ է կանխատեսում:
Ի պատասխան հարցին, թե ինչ քայլեր պետք է ձեռնարկի իշխանությունը ներքաղաքական լարվածությունը թուլացնելու համար, Շարմազանովը նշել է. «Մենք հարգում ենք այն բոլոր քաղաքացիներին, ովքեր չեն քվեարկել մեր թեկնածուի օգտին, նրանց կարծիքը կարեւոր է մեզ համար, եւ մենք պետք է հաշվի առնենք այդ իրականությունը: Հայերենը շատ հարուստ է, եւ պետք չի կիրառել «ճգնաժամ» եւ «լարվածություն» բառերը: Դրանք ծայրահեղական բառեր են: Ցանկացած ժողովրդավարական երկրում հաղթած քաղաքական ուժը ստանում է ընտրողների ձայների 55-56%-ը: Միաժամանակ, մենք չենք հերքում որոշ խնդիրների առկայությունը: Ինչպե՞ս է հնարավոր, որ երկրում խնդիրներ չլինեն»:
Պատասխանելով հարցին, թե երբ կգան այն ժամանակները, երբ երկրում խնդիրներ չեն լինի, Շարմազանովը նշել է, որ նման երկրներ չկան, իսկ Պլատոնի ներկայացրած կատարյալ աշխարհն ուտոպիա է:
Անդրադառնալով «Ժառանգություն» կուսակցության առաջնորդ, նախագահական ընտրություններին 36,75% ձայն հավաքած Րաֆֆի Հովհաննիսյանի ընտրած պայքարի ուղուն` խորհրդարանի փոխխոսնակը նշել է, որ իր համար վերջինիս ընտրած ուղին անհասկանալի է` չնայած որ ինքը շատ է հարգում Րաֆֆի Հովհաննիսյանին: «Ազատության հրապարակում նա հայտարարեց, որ 80% ձայն է հավաքել, Բաղրամյան 26-ի ճանապարհին հայտարարեց երկրորդ փուլի մասին, իսկ Բաղրամյան 26-ից դուրս գալիս` խորհրդարանական նոր ընտրությունների: Մեր երկիրը պատվերով համերգների տեղ չէ: Բոլորը պետք է ենթարկվեն Սահմանադրությանը»:
