նախընտրելի դարձնելՀայաստանում իրականացվում է տափաստանային բազեի բազմացման խթանմանն ուղղված ծրագիր: Բազեների այդ տեսակը գրանցված է Հայաստանի Կարմիր գրքում: Այդ մասին մարտի 30-ին կայացած ասուլիսում ասաց «Հայաստանի թռչունների պահպանության միության» էկոլոգիական ծրագրերի պատասխանատու Ծովինար Հովհաննիսյանը: Նրա խոսքով` ծրագրի շրջանակում արհեստական բներ կտեղադրվեն:
«Մենք մոնիտորինգ անցկացրեցինք, որի օգնությամբ պարզվեց, որ Հայաստանում բարենպաստ պայմաններ չկան տափաստանային բազեի բնավորման համար: Հենց այդ պատճառով նախաձեռնվեց արհեստական բների տեղադրումը, որից հետո դրական արդյունք նկատվեց»,- նշեց Հովհաննիսյանը: Նրա խոսքով` դա նպաստեց տափաստանային բազեի բազմացմանը: Սակայն տեսակի թվաքանակը տատանվում է, ուստի շարունակվում են ուսումնասիրություններն այն ուղղությամբ, թե ինչու բազեն չի կարողանում կայունացնել իր զարգացումը Հայաստանում:
Նա նաեւ ավելացրեց, որ «գունավոր շրջապտույտ է» իրականացվել: «Դրա միջոցով պարզվել է, որ 100-ից միայն 5 թռչուն է վերադարձել Հայաստան վերջին 3 տարվա ընթացքում»,-նշեց Ծովինար Հովհաննիսյանը:
