նախընտրելի դարձնելԻ՞նչ նպատակ էր հետապնդում Րաֆֆի Հովհաննիսյանը, երբ դեռեւս նախընտրական շրջանում թիրախ էր ընտրել Լեւոն Տեր-Պետրոսյանին եւ ՀԱԿ-ին, եւ գովերգում էր Սերժ Սարգսյանին: Այս մասին, այսօր՝ ապրիլի 12-ին, լրագրողների հետ հանդիպմանն ասաց ՀԱԿ պատգամավոր, ՍԴՀԿ (ընդդիմադիր) ատենապետ Լյուդմիլա Սարգսյանը՝ շեշտելով, որ ցավում է դրա համար:
Նա նշեց, որ իրենք անհանդուրժող չեն Րաֆֆի Հովհաննիսյանի նկատմամբ, բայց արձանագրում են, որ նա իր նախընտրական քարոզչությունը կառուցել է՝ թիրախ ընտրելով Լեւոն Տեր-Պետրոսյանին, մինչդեռ թիրախը պետք է լիներ Սերժ Սարգսյանը: Նա նշեց, որ ամենեւին էլ խանդի խնդիր չկա, ՀԱԿ-ը միայն ուրախ կլինի, եթե ժողովուրդը կարողանա իր հաղթանակն արձանագրել եւ դա լինի ոչ թե իրենց, այլ Րաֆֆի Հովհաննիսյանի օրոք:
Լյուդմիլա Սարգսյանի կարծիքով՝ ապրիլի 9-ի եւ մարտի 1-ի միջեւ տարբերությունը սարսափելի մեծ է: Նա շեշտեց, որ թեեւ իրենք ոչ մի հակաօրինական քայլ չէին անում, բայց իշխանությունն, իրոք, վտանգված էր, սպասում էին ՍԴ-ի վճռին, իսկ ՍԴ-ն, հնարավոր է, որ դրական որոշում կայացներ: «Այս անգամ միայն մենք չէ, որ կանխատեսում էինք այս ավարտը, իշխանություններն էլ, ճանաչելով Րաֆֆի Հովհաննիսյանի մեղմ հոգեկերտվածքը եւ ռոմանտիկ խառնվածքը, հասկանում էին, որ նա վտանգը չի ներկայացնում, ինչ Լեւոն Տեր-Պետրոսյանը եւ նրա թիմը»,- ասաց պատգամավորը
Անդրադառնալով այսօր կայանալիք հանրահավաքին՝ Լյուդմիլա Սարգսյանը կարծիք հայտնեց, որ Րաֆֆի Հովհաննիսյանը չի լինի: Նա հույս է փայփայում, որ «Ժառանգության» առաջնորդը կհասկանա, որ այն վստահությունը, որ փորձում էր վաստակել եւ ժողովուրդն էլ ակնկալում էր, որ Րաֆֆին պայքարը ավելի է լրջացնելու, այդ ակնկալիքներն այսօր ժողովուրդը չունի: Պատգամավորը կանխատեսեց, որ հանրահավաքին ժողովրդի մասնակցությունը շատ պասիվ է լինելու, իսկ ինքը չի ցանկանա Րաֆֆի Հովհաննիսյանին տեսնել մի հարթակում, որտեղ մարդկանց քանակը քիչ է լինելու եւ փաստելու է մարդկանց հիասթափության մասին. «Եթե նա այսօր դեռ Մոսկվայում է, պատճառ ունի հանրահավաքին չներկայանալու»,- ասաց նա:
Ի դեպ, հանրահավաքի չկայացման մասին կանխատեսումից հետո «Ժառանգությունից» Արմեն Մարտիրոսյանը նրան անվանել էր «սուտասան», ինչին ի պատասխան Լյուդմիլա Սարգսյանն ասաց, որ վաղաժամ է իրեն սուտասան անվանելը, բայց ինքը Արմեն Մարտիրոսյանի նկատմամբ ներողամիտ է, քանի որ հասկանում է նրա ծանր հոգեվիճակը:
Լուսանկարը՝ Արսեն Սարգսյանի/NEWS.am
