«Բարգավաճ Հայաստան» կուսակցությունը կարեւորում է եւ պատրաստ է համագործակցել  քաղաքական ուժերի, այդ թվում՝ ՀԱԿ-ի հետ: Այս մասին այսօր՝ ապրիլի 13ին, ՀԱԿ հիմնադիր համագումարում ասաց ԲՀԿ-ական պատգամավոր Ստեփան Մարգարյանը:

Նա նշեց, որ դեռեւս խորհրդարանական ընտրություններից առաջ ԲՀԿ առաջնորդ Գագիկ Ծառուկյանը հանդես է եկել լայն կոնսոլիդացիա ձեւավորելու նախաձեռնությամբ, ինչը արդիական է նաեւ այսօր, բոլոր ուժերի եւ հնարավորությունների համախմբում  երկրի առաջ ծառացած խնդիրները լուծելու նպատակով:

Նա միասնական շտաբի գործունեությունը համարում է հաջողված, բայց ոչ իդեալական, այս գաղափարի շուրջ հասարակական արձագանքը եւս վկայում է, որ դա ճիշտ քայլ էր եւ անհրաժեշտ է  զարգացնել, քաղաքական ուժերի միջեւ անկեղծ համագործակցությունը այլընտրանք չունի:  «ԲՀԿ-ն գնում է ընտրությունների հաղթելու նպատակով, ընդհանուր հաղթանակը եւ քաղաքական մոնոպոլիայի վերացումը եւս հաղթանակ է»,- ասաց Ստեփան Մարգարյանը: Պատգամավորը նաեւ շեշտեց, որ ՀԱԿ-ը ստեղծվում է  այնպիսի քաղաքական ուժերի եւ բազայի վրա, ովքեր գալիս են դեռեւս արցախյան շարժման եւ պետականության ձեւավորման ակունքներից, նրանք իրենց դերակատարումն են ունեցել: Նա  վստահ է, որ նորաստեղծ կուսակցությունը ուրույն խոսքն է ասելու եւ իր տեղն է ունենալու:

Ստեփան Մարգարյանը ՀԱԿ-ին մաղթեց հաջողոթյուններ նախընտրական շրջանում եւ ընտրությունների բուն արդյունքում:

ՀԱԿ-ի հիմնադիր համագումարի աշխատանքները ողջունել եւ հաջողություն են մաղթել նաեւ Եվրոպայի մի շարք քույր կուսակցություններ, Եվրոպայի լիբերալ կուսակցության նախագահն է ուղերձ ուղարկել: 

Համագումարը վարող Արամ Մանուկյանը հայտարարեց, որ այս պահի դրությամբ գրանցած է  1098 պատվիրակ:  Այժմ ցուցադրվում է վավերագրական ֆիլմ ՀԱԿ-ի անցած ճանապարհի մասին:

Լուսանկարը՝  Արսեն Սարգսյանի/NEWS.am