Ջավախքում հայ ակտիվիստ Վահագն Չախալյանի եղբոր ձերբակալության մեջ քաղաքական  ենթատեքստ չկա: Այդ մասին այսօր՝ հուլիսի 1-ի մամուլի ասուլիսում հայտնել է փորձագետ Հայկազուն Ալվրցյանը: 

Ըստ նրա` Ջավախքն այն շրջանն է, որտեղ ցանկացած հարց կենցաղայինից եւ սոցիալականից կարող է վերաճել  քաղաքականի: «Քաղաքական համատեքստը կախված է իշխանությունների մոտեցումից: Չեմ կարծում, որ հարցերը կարելի է դիտարկել այդ տեսանկյունից, ներկայումս մենք Ջավախքում ոչ մի խնդիր չունենք», - նշել է Հայկազուն Ալվրցյանը՝ ընդգծելով, որ ճիշտ կլինի սպասել վրացական կողմի գնահատականներին եւ հետո միայն սեփականը տալ:  

Ալվրցյանը նաեւ հավելել է, որ Ջավախքում իրավիճակը դեռ  երկար չի փոխվի:  «Չեմ կարծում, որ արմատական փոփոխություններ լինեն: Ջավախքի զարգացման հեռանկարները պետք է կախված լինեն շրջանը համագործակցության գոտու վերածելու երկու պետությունների բարի  կամքից», - եզրակացրել է փորձագետը:

Հիշեցնենք, որ ըստ պաշտոնական տվյալների՝ հունիսի 28-ին Ջավախքի հայ երիտասարդության  շրջանում ծագած կռվի ժամանակ կալանավորվել էին 17 մարդ: Ձերբակալվել էր նաեւ հայ ակտիվիստ Վահագն Չախալյանի եղբայր Արմեն Չախալյանը:

Լուսանկարը՝ Արսեն Սարգսյանի/ NEWS.am