Երեւան քաղաքի երկու բնակիչների կողմից առանց իրացնելու նպատակի թմրամիջոցի ապօրինի շրջանառության եւ օժանդակության փաստի առթիվ հարուցված քրեական գործի շրջանակներում թվով երեք անձանց մեղադրանք է առաջադրվել:

Դատախազության մամուլի ծառայությունից հայտնում են, թե ապօրինի թմրամիջոց պահելու եւ օգտագործելու կասկածանքով 2013թ. հունիսի 25-ին ոստիկանության Մեծամորի բաժին բերման են ենթարկվել Երեւան քաղաքի բնակիչներ Ս.Սիմոնյանը եւ Հ.Կարապետյանը, որոնց անձնական խուզարկությամբ հայտնաբերվել է առանձնապես խոշոր չափերի համապատասխանաբար 51.584 եւ 48.667 գրամ ափիոն տեսակի թմրամիջոց:

Փաստի առթիվ նույն օրը հարուցվել է քրեական գործ` ՀՀ քրեական օրենսգրքի 266-րդ հոդվածի 3-րդ մասի 2-րդ կետով եւ 268-րդ հոդվածի 3-րդ մասով:

Նախաքննության ընթացքում ձեռնարկված միջոցառումների արդյունքում պարզվել է թմրամիջոց ձեռք բերելու հարցում Հ.Կարապետյանին օժանդակած անձի ինքնությունը: Ըստ այդմ, Հ.Կարապետյանը Ժ.Թեւոսյանի միջոցով թմրամիջոցը ձեռք բերել Գորիսի բնակիչ Ս.Սայունցից, ով մահացել է:

Ձեռք բերված ապացույցների հիման վրա Ս.Սիմոնյանին եւ Հ.Կարապետյանին մեղադրանք է առաջադրվել առանց իրացնելու նպատակի թմրամիջոցների ապօրինի շրջանառության, իսկ Ժ.Թեւոսյանին` թմրամիջոցների ապօրինի շրջանառությանն օժանդակելու համար:

Ս.Սիմոնյանի, Հ.Կարապետյանի եւ Ժ.Թեւոսյանի նկատմամբ որպես խափանման միջոց է ընտրվել կալանավորումը: Նախաքննությունը շարունակվում է: