նախընտրելի դարձնել
Հայաստանի Բնապահպանության նախարարությունը դիմել է ոստիկանություն՝ Արարատի մարզի Դալար համայնքի տարածքում ձկների զանգվածային ոչնչացման դեպքի առիթով:
«Սույն թվականի հուլիսի 15-ին էլեկտրոնային լրատվամիջոցներում լուր էր տարածվել, որ Արարատի մարզի Դալար համայնքի տարածքով անցնող ջրանցքում արձանագրվել է ձկների զանգվածային ոչնչացման դեպք: Վերոհիշյալ տեղեկատվության հիման վրա ՀՀ բնապահպանության նախարարությունում բացվել էր թեժ գիծ եւ Բնապահպանական պետական տեսչությանը հանձնարարվել՝ ուսումնասիրել մամուլում տարածված ահազանգը:
ՀՀ բնապահպանության նախարարության աշխատակազմի բնապահպանական պետական տեսչության Արարատի տարածքային բաժնի աշխատակիցները ուսումնասիրության արդյունքում Դալար համայնքի վարչական տարածքի մակերեւութային ջրերում հայտնաբերել եւ արձանագրել են ձկների զանգվածային ոչնչացման փաստ:
«Բնապահպանական վերահսկողության մասին» ՀՀ օրենքի 27-րդ հոդվածի եւ ՀՀ քրեական օրենսգրքի 287, 292 եւ 293 հոդվածների համապատասխան, որպես հանցագործության հատկանիշներ պարունակող դեպք, ՀՀ բնապահպանության նախարարության բնապահպանական պետական տեսչությունը դիմել է ՀՀ ոստիկանություն: Տեսչության տարածքային բաժնի անալիտիկ լաբորատորիաների աշխատակիցները իրականացրել են վերոհիշյալ համայնքի մակերեւութային ջրերի նմուշառում, ինչպես նաեւ հետազոտման համար վերցրել են սատկած ձկների նմուշներ: Լաբորատոր հետազոտությունների արդյունքների մասին ՀՀ բնապահպանության նախարարությունը կտեղեկացնի լրացուցիչ»,- ասվում է նախարարության հաղորդագրության մեջ:
