Նախագահ Սերժ Սարգսյանն այսօր՝ հոկտեմբերի 11-ին այցելել է Սփյուռքի նախարարություն եւ մասնակցել նախարարության 5-ամյա գործունեության ամփոփմանը նվիրված միջոցառմանը: Մինչ այդ, Հանրապետության նախագահը շրջայց է կատարել նախարարությունում, ծանոթացել աշխատակազմի ստորաբաժանումների աշխատանքային պայմաններին, զրուցել աշխատակիցների հետ՝ նրանց կողմից իրականացվող ընթացիկ աշխատանքների եւ առաջիկա ծրագրերի վերաբերյալ: Սերժ Սարգսյանը դիտել է նաեւ Սփյուռքի նախարարության անցած 5 տարիների գործունեությունը ներկայացնող ցուցահանդեսը:

Նախագահի մամուլի գրասենյակից հայտնում են, թե նախարարության աշխատակազմի, համահայկական կազմակերպությունների, Սփյուռքի նախարարության գործընկեր կառույցների, հոգեւոր դասի ներկայացուցիչների, Հայաստան-Սփյուռք զարգացմանն իրենց նպաստը բերած պետական, քաղաքական, հասարակական գործիչների, մտավորականների մասնակցությամբ կայացած միջոցառման ժամանակ իր ողջույնի խոսքում Հանրապետության նախագահը շնորհավորել է Սփյուռքի նախարարության հիմնադրման հոբելյանի առթիվ, խոսել նախարարության առջեւ դրված խնդիրների, անցած ուղու եւ ձեռքբերումների, այդ կառույցի առաքելության ու նրա կողմից իրականացվելիք հետագա ծրագրերի մասին: Սերժ Սարգսյանը վստահություն է հայտնել, որ նախարարությունն առաջիկայում կյանքի կկոչի ազգային նպատակների, համահայկական իղձերի իրագործմանն ուղղված ավելի մեծ ծրագրեր եւ որոշ ժամանակ հետո իր աշխատանքի արդյունքներով կդառնա այնպիսի կառույց, ինչպիսին ցանկանում է տեսնել յուրաքանչյուր հայ: Սերժ Սարգսյանը նախարարությանը մաղթել է նորանոր ձեռքբերումներ համայն հայության ներուժը մեկտեղելու, Հայաստան հայրենիքը հզորացնելու եւ Սփյուռքը հայ պահելու համազգային այդ դժվարին առաքելության իրագործման ճանապարհին:

«Հինգ տարի առաջ Սփյուռք–Հայաստան կապերին նոր որակ հաղորդելու նպատակով ստեղծվեց պետական կառավարման այս մարմինը՝ Սփյուռքի նախարարությունը, որի խնդիրն էր համագործակցելով մեր դիվանագիտական ծառայության, ասել է թե՝ Արտաքին գործերի նախարարության եւ սփյուռքյան կառույցների հետ, նպաստել հայապահպանությանը, օժանդակել հայրենադարձությանն ու նպաստել Սփյուռքի ներուժի օգտագործմանը՝ ի շահ Հայաստանի Հանրապետության, ի շահ հայ ժողովրդի: Եվ ուրախ եմ, որ այս ժամանակահատվածում Սփյուռքի նախարարությունը դարձել է այդ աշխատանքի հիմնական օղակը: Այժմ նախարարության միջոցով ենք իրականացնում հայապահպանությանը նպաստող բազմաթիվ ծրագրեր, որոնք միտված են մեր ազգային ինքնության պահպանմանը, մայրենի լեզվի եւ հայ մշակույթի տարածմանը, հայկական ավանդույթների պահպանմանը:

Նախարարության կարեւոր խնդիրներից է՝ բացահայտելով Հայրենիքի եւ Սփյուռքի ներուժը, նպաստել առանձին ուղղություններով համատեղ ծրագրերի մշակմանն ու իրականացմանը: Մասնագիտական համաժողովների միջոցով արդեն հաջողվել է իրար կապել տարբեր մասնագիտությունների տեր հազարավոր մարդկանց: Սա, կարծում եմ, բավականին արդյունավետ ճանապարհ էր:

Սիրելի՛ հայրենակիցներ,

Հայության համախմբվածությունը եւ մեր համատեղ ներուժը կարող են բազմապատկել մեր մրցակցային առավելություններն արդի աշխարհում: Անցած ժամանակաշրջանում նախարարությանը հաջողվել է Սփյուռքի կառույցների եւ կազմակերպությունների հետ հաստատել փոխվստահության ջերմ հարաբերություններ, ինչն ամուր հիմք է հետեւողական աշխատանքի համար։

Այդ կազմակերպություններն աշխարհասփյուռ մեր ժողովրդի հայապահպանության հիմնասյուներն են: Նրանց շնորհիվ սերնդեսերունդ են փոխանցվում մեր հոգեւոր ժառանգությունը, Հայրենիքի հանդեպ սիրո, նվիրումի եւ պատասխանատվության զգացմունքները։ Անհրաժեշտ է առավելագույնս համադրել պետության եւ համահայկական կառույցների ծրագրերը։ Պետք է ձգտել յուրաքանչյուր կառույցի հետ ունենալ մի քանի երկարաժամկետ ծրագիր:

Այս տարիների լավագույն ձեռքբերումների շարքում կարող ենք նշել հայ մշակութային ժառանգության պահպանմանը միտված քայլերը: Նշված ուղղությամբ մեծ աշխատանք է իրականացվում հոգեւոր կառույցների, առաջին հերթին Հայաստանյայց Առաքելական Սուրբ Եկեղեցու հետ:

Սիրելի՛ բարեկամներ,

Սփյուռքի նախարարությունը ոչ միայն կայացել է, այլեւ դարձել է զարգացող եւ հեռանկարային կառույց, որը լծված է հայության օրակարգային խնդիրների լուծմանը: Այս կառույցն է այն շաղախը, որ կապում է Սփյուռքը Հայրենիքին, ամրացնում եւ ուղղորդում է այդ կապը: Նախարարությունն իր 5-ամյա գործունեությամբ ապացուցեց Սփյուռքի հետ հարաբերությունների համակարգման եւ պետության հետ առնչությունների կենտրոնացման նպատակահարմարությունը։ Այս տարիների աշխատանքի արդյունքում ստեղծվել է փոխըմբռնման, վստահության եւ համագործակցության բարենպաստ մթնոլորտ համայն հայության ներուժը մեկտեղելու, Հայաստան հայրենիքը հզորացնելու եւ Սփյուռքը հայ պահելու համար»,-ասել է նախագահ Սերժ Սարգսյանը:

Հանդիպման ավարտին Սփյուռքի նախարարության մի խումբ աշխատակիցների՝ երկարամյա ու բարեխիղճ աշխատանքի համար եւ մեր մի խումբ հայրենակիցների` Հայրենիք-Սփյուռք կապերի ամրապնդման, ինչպես նաեւ հայապահպանության գործում ներդրած ավանդի համար Հանրապետության նախագահը հանձնել է ՀՀ պետական բարձր պարգեւներ եւ ՀՀ նախագահի շնորհակալագրեր: