նախընտրելի դարձնելԱՄն կատարած աշխատանքային այցի վերջին օրը ՀՀ վարչապետ Հովիկ Աբրահամյանը հանդիպում է ունեցել Արժույթի միջազգային հիմնադրամի տնօրեն Քրիստին Լագարդի հետ:
Վարչապետը բարձր է գնահատել Հայաստանի տնտեսական զարգացման եւ ինստիտուցիոնալ բարեփոխումների գործում Արժույթի միջազգային հիմնադրամի հետ համագործակցությունը: «Մակրոտնտեսական հարցերում ԱՄՀ-ն եղել եւ մնում է մեր կարեւոր գործընկերը: Մակրոտնտեսական կայունությունը Հայաստանի անկախացումից ի վեր մեր կարեւորագույն ձեռքբերումներից է, ինչին տարիների ընթացքում մեծապես նպաստել է ԱՄՀ-ն»,- ասել է Հովիկ Աբրահամյանը: Վարչապետը նշել է, որ տարեսկզբին ԱՄՀ խորhրդի կողմից հաստատված եռամյա ծրագիրը զարգացման նոր փուլ է նախանշում Հայաստանի տնտեսության համար՝ վստահություն հայտնելով, որ ծրագրի իրականացման արդյունքում Հայաստանն ընդհուպ կմոտենա զարգացող շուկաներ ունեցող երկրների ճամբարին: Հովիկ Աբրահամյանը ընդգծել է, որ կառավարությունը վճռական է տրամադրված շարունակելու բարեփոխումները տարբեր ոլորտներում՝ ուղղված տնտեսության զարգացմանը եւ երկրի մրցունակության բարձրացմանը:
ԱՄՀ տնօրեն Քրիստին Լագարդը, ողջունելով վարչապետ Հովիկ Աբրահամյանին եւ կարեւոր համարելով Հայաստանի հետ հետագա համագործակցությունը, նշել է. «ԱՄՀ-ն բոլորի տունն է եւ Հայաստանը այդ ընտանիքի լիիրավ անդամն է: Հայաստանը վստահելի գործընկեր է եւ մենք շարունակելու ենք համագործակցությունը Հայաստանի հետ եւ օժանդակելու տնտեսության զարգացմանն ուղղված կառուցվածքային բարեփոխումներին»:
Հանդիպման ընթացքում կողմերը քննարկել են հետագա համագործակցությանն առնչվող մի շարք հարցեր:
