նախընտրելի դարձնելՄիացյալ Նահանգներում Ադրբեջանի վարկանիշը վերականգնելու նպատակով երկրի իշխանությունները կրկին դիմում են լոբբիստական ընկերությունների ծառայություններին:
Հերթական պայմանագիրը Վաշինգտոնում Ադրբեջանի դեսպանատունը կնքել է Լիզ Մեյրի հետ, ով Ամերիկայի Հանրապետական կուսակցության նախկին խորհրդականն է եւ քաղաքական ռազմավարության մասնագետ։
«Ազատություն» ռադիոկայանի փոխանցմամբ, ըստ պայմանագրի՝ Մեյերին պատկանող «Մեյր Ստթրաթեջիս» ընկերությունը պարտավոր է լուսաբանել Ադրբեջանի զարգացումները՝ փորձելով ազդել տարբեր պետական պաշտոնյաների եւ հասարակական կարծիքի վրա։ Այս ծառայության համար Ադրբեջանը վեց ամիս շարունակ Մեյրին կվճարի ամսական 15 հազար դոլար։
Երկրի եւ իշխանությունների վարկանիշը վերականգնելուն ուղղված այս գործարքն Ադրբեջանը կնքում է վերջին շրջանում սուր քննադատությունների ալիքի ֆոնին, որոնք հնչեցվում են արեւմտյան պաշտոնյաների, վերլուծաբանների եւ իրավապաշտպան կազմակերպությունների կողմից՝ այդ երկրում մարդու իրավունքների ոլորտում տխուր իրավիճակի պատճառով։
Եվրոպական կայունության նախաձեռնության համաձայն, Ադրբեջանը Եվրոպայի խորհրդի նախարարների կոմիտեի նախագահությունը ստանձնելուց ի վեր կտրուկ ուժեղացրեց բռնաճնշումները քաղաքացիական ակտիվիստների նկատմամբ։ Միեւնույն ժամանակ Ադրբեջանի իշխանությունները ջանքեր չեն խնայում երկիրը ներկայացնելու որպես Միացյալ Նահանգների եւ Եվրոպայի արժեքավոր դաշնակից, ինչպես նաեւ էներգետիկ անվտանգության ապահովման կարեւոր խաղացող։
Մինչդեռ Ադրբեջանի քննադատները նշում են՝ Ալիեւի վարչակարգը օգտվելով առիթից, որ միջազգային հանրության ուշադրությունը կենտրոնացած է ուկրաինական ճգնաժամի վրա, երկրում բռնաճնշումներ կազմակերպեց լրագրողների, իրավաբանների եւ առհասարակ իր ընդդիմախոսների դեմ։
Վաշինգտոնում Ադրբեջանի դեսպանատունը ամեն ամիս 50 հազար դոլար է մուծում հանրային կապերով եւ լոբբինգով զբաղվով Podesta ընկերությանը` «Ադրբեջանի եւ ԱՄՆ-ի պետական կառույցների միջեւ կապերի սերտացման վերաբերյալ ռազմավարական խորհրդատվություն տրամադրելու դիմաց», նշում էր թերթը։
Արեւմտյան լրատվամիջոցները մի քանի տասնյակ PR-ով զբաղվող ընկերություններ են նշում, որոնք զբաղվում են Ադրբեջանի վարկանիշ բարելավելով՝ Atlantic Council, Fabiani & Company, Livingston Group , DCI group եւ այլն։
Sunlight ընկերության վերջին ուսումնասիրությունները փաստել են, որ 2013 թվականին Ադրբեջանը Միացյալ Նահանգներում իր շահերն առաջ մղող օտարերկրյա կառավարությունների շարքում տասերորդ տեղում էր գտնվում՝ դրա վրա ծախսելով գրեթե 2.3 միլիոն դոլար։
