նախընտրելի դարձնել
Փետրվարի 3-ին Արգենտինայում ՀՀ նորանշանակ դեսպան Ալեքսան Հարությունյանը Արգենտինյան Հանրապետության նախագահական պալատում իր հավատարմագրերը հանձնեց Արգենտինայի փոխնախագահ, Սենատի նախագահ Ամադո Բուդուին:
Հավատարմագրերի հանձնման պաշտոնական արարողությանը հաջորդեց Արգենտինայի փոխնախագահ Ամադո Բուդուի եւ դեսպան Հարությունյանի առանձնազրույցը:
Շնորհավորելով եւ ողջունելով դեսպանին` փոխնախագահ Բուդուն հույս հայտնեց, որ վերջինս լավագույնս կնպաստի հայ-արգենտինական` երկկողմ բարձր մակարդակի հարաբերությունների ամրապնդմանն ու զարգացմանը: Արգենտինայի փոխնախագահը բարձր գնահատեց 2014թ. հուլիսի 7-8-ը ՀՀ նախագահ Սերժ Սարգսյանի` Արգենտինա կատարած պաշտոնական այցը եւ կարեւորեց այցի ընթացքում ձեռք բերված բարձր մակարդակի պայմանավորվածություններն ու գրանցված արդյունքները: Ամադո Բուդուն անդրադարձավ նաեւ արգենտինահայ համայնքին՝ կարեւորելով վերջինիս ազդեցիկ դերակատարությունը երկրի հասարակական-քաղաքական կյանքում: Արգենտինայի փոխնախագահը պատրաստակամություն հայտնեց իր նպաստը բերել հայ-արգենտինական հարաբերությունների բազմակողմանի զարգացմանը:
Դեսպան Հարությունյանն իր հերթին նշեց, որ իր պաշտոնավարման ընթացքում կանի առավելագույնը` երկու բարեկամ պետությունների միջեւ կապերն էլ ավելի սերտացնելու եւ ամրապնդելու համար:
Նախագահական պալատում տեղի ունեցած արարողությունից հետո դեսպանն այցելեց Արգենտինայի ազգային հերոս, գեներալ Սան Մարտինի անվան հրապարակ, որտեղ ծաղկեպսակ զետեղեց գեներալ Սան Մարտինի հուշարձանին:
